Seguro daghan ug trabaho ang akong mga pag-umangkon nga tu-a sa gawas sa nasud. O dili ba, nalingaw sa kasaulogan sa Pasko mao nga walay usa nga nakapadala ug e-mail sa ako-a hangtud sa akong pagsulat niini.
Kini ang hinungdan nga sukwahi sa naandan ang akong hisgutan dinhi sa akong lindog karon.
Niadtong milabay nga semana halos matag adlaw ang mga kompaniya dinhi sa dakbayan sa Dabaw dunay mga Christmas party nga gihimo. Wa nako damha nga diay dunay mga gagmay lang nga mga kompaniya kon itandi sa mga higante nga korporasyon sama sa Ayala, San Miguel, Metro Pacific, ug uban pa. Mora lang ni ang mga lokal ug kumingking sa tiil.
Pero kon ang pagahisgutan mao ang ilang pagtratar sa mga yano nilang mga kawani, mas dako pa kaayo ang ilang mga kasingkasing.
Nahibaw-an nako nga dunay duha ka mga gagmay nga mga lokal nga kompaniya nga higante ug mga kasingkasing sa ilang mga kawani. Kini mao ang mosunod:
Rely Construction and Supply Corp., gipanag-iya sa usa ka negosyante nga anak sa mipanaw na nga Kapitana sa barangay diha sa Bajada. Kasagaran sa ilang mga proyekto iya sa gobiyerno. Pero daghan usab nga mga infrastraktura nga gihimo niini gipanag-iya sa mga pribadong negosyante.
Sumala sa akong nahibaw-an, kaniadtong milabay nga Christmas party sa Rely Construction dili lang basta yano nga pinaskuhan ang nadawat sa mga kawani. Usa ka dako nga sorpresa ang nakapalukso sa ilang mga kasing-kasing sa dihang gipahibawo sa Presidente sa Rely nga ang kompaniya nagpalit ug yuta didto sa Bunawan nga himuon nga subdivision aron katukoran ug mga balay sa mga kawani niini.
Subay sa akong nadungog gikan sa mga nakatambong didto ang yuta ihatag sa mga kawani nga benepisyaryo. Ang kompaniya mao ang mag tikad sa subdivision samtang ang mga kawani nga benepisyaro mao na ang magtukod sa ilang mga balay. Matud pa, gikan sa 100 ngadto sa 120 ka metro kwadrado ang gidak-on sa mga luna.
Unya, human gianunsiyo sa tag-iya sa kompaniya ang maong gasa gitunol na usab niini ngadto sa iyang mga trabahante ang ilang pinaskuhan nga naglakip ug tagtunga sa sako nga bugas matag usa.
Wa pa hinuon ko masayud unsa ang mga guidelines aron mamahimong makabeneposyo ang mga kawani sa maong gasa sa Rely Construction.
Usa pa lang ka lokal nga kompaniya ang akong nadunggan nga naghimo sa ingon. Pero gipabayran ang luna sa kubos kaayo nga presyo sa mga kawani niini. Kini mao ang NCCC Department Store kansang pabalay nga proyekto naa luyo sa planta sa Davao Light.
Lain pa nga kompaniyang lokal nga nagpakita sa kadako sa kasingkasing niini ngadto sa iyang mga trabahante mao ang Philippine GBCB Management Corporation (PGMC) ubos sa Presidente niini nga si Merla Mamaril.
Atol sa Christmas Party sa maong kompaniya kansang mga negosyo naglakip sa “brokerage” nagtunol ngadto sa mga trabahador ang dagko kaayo nga “financial benefits” sa mga kawani nga maayo ang binuhatan, dugay na nga nagserbisyo ug nagapakita ug maayong liderato sa mga kalihukan sa kompaniya.
Sumala pa sa mga nadawat nga taho niining lindog, dunay grupo sa mga trabahante nga gipremyuhan ug libre nga biyahe ngadto sa Kuala Lumpur, Malaysia. Duna pa gyud pocket money.
Gawas sa mga gimando sa balaod nga mga benepisyo daghan usab nga mga insentibong pinansiyal ang nadawat sa mga kawani. Ang mga nasulod sa length of service category gihatagan ug benepisyo nga salapi nga wa nila damha nga ingon niadto kadako.
Bisan gani kadtong mga tawo nga naghatag lang ug serbisyo subay sa kontrata sama sa mga tag-iya ug sakyanan nga gihimo nga service vehicles sa mga bisita ug opisyales sa kompaniya nga dunay lakaw gawas sa dakbayan duna pud nadawat gikan sa PGMC. Bisan mismo ang naghatag ug sounds and light services sa matag higayon nga dunay dagko nga programa ang kompaniya sama sa sportsfest ug uban pa gihatagan usab ug Plaque of Appreciation ug cash nga salapi.
Mao nga sa pagkahuman kuno sa ilang Christmas Party dagko kaayo ug ngisi ang mga kawani lakip na ang mga bisita nga dunay insentibo nga nakuha.
Unta ingon niini ka mahuna-hunaon ang mga dagko kaayong mga korporasyon sa ilang mga kawani. Pero ang nahitabo karon maayo kayo sa pagpagawas ug mga press releases ang pipila kanila labi na kon kuno ang ilang gihimo makabeneposyo sa komunidad.
Pero kasagaran, halos makalimtan na nila ang ilang kaugalingoin nga mga kawani. Bisan gani ang gimando sa balaod nga mga benepisyoin halos ipiton pa.
Seguro kon sundon sa mga dagkong kompaniya ang gibuhat sa duha ka mga gagmay nga korporasyon lokal grabe gyud seguro kaayo ang pagkaproduktibo sa mga kawani sa ilang matag buhat.
Kini nga lindog nagsaludo sa Rely Construction ug sa PGMC. Gagmay tinuod kamo ikompara sa uban nga mga kompaniya. Pero yayay kon ang hisgutan mao ang pagpakabana sa ilang mga kawani.
Mabuhay kamo!
