Sayo sa buntag kagahapon nakasabay ko ug mata sa akong Misis kinsa iya na nga naandan nga mag-andam sa pamahaw ug bawon sa among duha ka mga apo sa ilang pag-eskwela gikan Lunes hangtud Biyernes. Mao ni akong gitawag ug “Apo stolic” nga trabaho.
Mao nga nagtempla na lang ko ug kape kay alanganin na man mobalik ug katulog. Ug samtang naghigop sa kape nga labihang inita didto nako modiretso sa akong computer aron susihon kon dunay mga e-mail nga gipadala sa ako-a.
Human ang pipila ka lad-ok nanggawas na ang akong singot sa agtang ug dinhi napiskay ang akong utok nga nagsugod na ug galing sa mga ideya nga gusto nako masulat sa akong lindog binisaya.
Pero wa pa nako hingpit nga naabli ang akong e-mail box, ni kuriring ang akong cellphone. Ako kining gitubag ug nakurat ko sa dihang akong nabati ang pamilyar kaayong tingog – iya sa akong si-aw nga pag-umangkon nga si JB kon John Brian.
“Good Morning nimo diha ‘Kol Vic. Seguro nagkape ka karon mga orasa diha sa inyong balay sa Dabaw. Sori ‘Kol nga nagsamoksamok ko nimo sayo niining buntaga. Unsaon wa man ko’y gihimo diri. Tawag sa lawas mao nga nakamata pud ko ug nakahuna-huna ko nga manawag sa imoha diha.”
Bisan sa akong kakurat ako gihinay pagtubag si JB:
“Maayong gabi-I (?) nimo sab diha JB. Kakurat man sab ka Doy nga naggamit man ka ug mobile aron lang mangumusta sa ako-a. Seguro daghan ka na ug tinigom diha kay ka ‘afford’ na man ka mogamit ug cellular aron lang makig-estorya sa ako-a inay sa e-mail nalang kay makapatuyang pa ta ug tabi. Asa man ka karon Doy?”
“Na-a ko sa Jeddah ‘Kol, nanginabuhi pa gihapon aron dunay madala sa akong pag-uli diha sa Pinas. Sori ‘Kol Vic wa ko ka e-mail sa imoha sa niaging semana kay na busy pud mi sa restaurant. Mao nga nagtawag ko karon kay basin ug naghuna-huna ka nga nanglu-od ko sa imoha. Bitaw ‘Kol musta man atong bag-ong Bise Mayor nga si Baste. Idolo ra ba na siya nako ‘Kol kon laag-laag ang hisgutan. Gusto nako makaadto pud sa mga dapit sa Pinas nga iyang adto-an labi na didto sa mga surfing areas sama sa Siargao. Kaya lang ‘Kol Vic hangtud pag-idolo lang; di gyud ko kaadto sa iyang naadto-an. Unsaon di man motugot ang akong bulsa ug ilang bulsa ni Mama ug Papa. Mga buslot man. Mao nga sa Jeddah nalang ko ning adto ug dili mag surfing kon dili maghiwa ug mga gulay, lamas ug ubang karne nga mahimong kaonon sa mga Muslim nga among mga kustomer.”
“Luoya sab diay nimo Jib uy, Kahilak man pud ko sa imoha nga maghuna-huna nga gusto diay ka magsuroysuroy sa mga dapit nga naadto-an ni Vice Baste. Pero ana man gyud na JB. Kon buslot ang bulsa wa pud sulod. Mao nga unahon gyud natong tapakan ang buslot ug maningkamot nga dunay ikasulod sa bulsa nga natapakan na.Maayo ka man seguro diha kay gawas nga natapakan na ang buslot sa imong bulsa daghan na pud seguro ug sulod. Unsaon ra man diay tong mga ‘tip’ sa imohang mga customer sa waiter ka pa? Seguro nagguot na to sa imong bulsa. Bitaw Jibby, agi ug tubag sa imong pangutana kon kumusta na ang imong idolo nga si Bise Mayor Baste, mora ug sa akong personal nga pagpaniid sa iyaha nagpakita kini ug dakong interest nga makat-on sa iyang responsibilidad isip ikaduhang labing taas nga opisyal sa dakbayan. Sa una niyang duha ka sesyon nga siya ang ‘nag preside’ medyo bakikaw pa. Pero sumala sa mga nakasaksi sa iyang pagmuwestra ug barog mora ug bug-at. Mao nga mahimong kaya niya nga dumalahon ang konseho.Gawas pa, kinsa man pud ang mosulay sa pagsungag sa iyaha nga tanan iya man ngakaabin sa politika.”
Dali nga misal-ot ang akong pag-umangkon, “Mao ba ‘Kol Vic? Mora ug bug-at ug harong ang akong idol? Katahaan diay siya sa iyang mga kauban sa Konseho? Di lang diay ang medyo dako niyang kaha sa lawas ang katahaan sa mga konsehal sa iyaha, pati na pud iyang barog ug harong? Ang iyang sinultihan ‘Kol Vic?”
“Subay usab sa mga balita ug mga komentaryo maklaro nga medyo nagkarapkarap pa kay duha pa baya ka semana human sa iyang paglingkod. Natural lang Jib nga di pa anad ang dila sa mga pulong litokunon sa mga sesyon. Pero klaro nga naa siya’y ‘mentor’ nga mao ang naghatag kaniya ug giya aron matumbok ang unsa man buot niya mapasabot sa konseho ug sa mga tawo nga naminaw sa deliberasyon sa sesyon. Diha niana nga aspeto angayan nga daygon ang batan-on nga bise mayor. Kay bisan si kinsa nga buot makat-on sa iyang trabaho di angayan maulaw nga magpatudlo ug mangutana. Ug labing importante nga siya magtuon ug di magpakaaron ingnon nga nakahibawo na.Diha angayan nga daygon si Vice Baste.”
“Mao ba ‘Kol Vic?Di diay ko maulaw manghambog diri sa akong mga kauban nga mga Pinoy nga ang akong idolo nga si Vice Baste posible nga maayong Bise Mayor ug nga dunay potensiyal nga mosaka pa ug pwesto sa lokal nga kagamhanan sa Dabaw sa umaabot.”
Dali sab nako nga salo kang JB, “Pero Doy, duna lang ko gikabalak-an sa bag-ong Bise; mora ug dunay tendensiya nga makalimot nga ang iyang trabaho magdumala sa konseho nga tigpanday ug mga ordinansa sa dakbayan. Subay man gud sa iyang saysay sa mga tigbalita, sa una kuno niyang duha ka semana sa opsisina nakahimo siya sa pagtabang sa mga tawo nga nanginahanglan ug tabang nga ning-adto sa iyang opisina. Di man gud na mao ang labing dako nga responsibilidad sa Bise Mayor ug sa Konseho nga iyang gipangulohan. Basin diha siya masaag Jib, di ba?
Nahilum kadali si JB sa pikas nga linya sa telepono. Sa akong huna-huna nahutdan na siya ug load. Pero kalit lang, “Kol, basin naa pa kape diha sa inyong balay sa Skyline. Pwede ko hapit aron diha na ko magkape? Medyo kutoy na ako tiyan kay sayo kaayo akong flight?”
“Buang ani, asa man diay ka Jib, ning-uli na ka?”
“Bitaw ‘Kol gikan ko sa Davao Airport, paingon na ko diha sa inyo una mopadayon didto sa bukid. Mangape ra gud ko”
Mga duha ka minuto ningpara na ang taksi diin sakay ang karaho nakong pag-umangkon. Gusto diay niya sorpresahon iyang mama ug asawa.
-30-
