Human manihapon kaniadtong Huwebes sa gabi-I nagtimpla ko ug kape subay sa ako na nga naandan. Kini tungod kay sa akong pamati ma-relaxed ko sa akong huna-huna. Parehas ba sa manigarilyohay nga tawo nga ang kanunay rason nganong manigarilyo mao nga kuno maka “relax” nga bati-ion kon kini ilang himu-on. Pero ang tinuod, bisyo ra gud ang gihimo.Seguro kon ang pag-inom usa ka bisyo, ingon pud ana ang rason ngano nga magkape gihapon ko human manihapon.
Akong gidala ang nangalisngaw sa kainit ug kahumot nga bag-ong tinimpla nga kape didto atubangan sa akong “computer” diin naglad-ok una ko ug pipila ka higop sa init nga kape. Igo nga ninggawas ang akong mga singot sa agtang ako usab nga gibuksan ang akong computer aron susihon ang akong e-mail.
Tu-od man ako’ng nakita nga dunay mga mensaheng gipadala sa ako-a. Kasagaran ini pagpadayag sa ilang pag-uyon sa mga isyu nga akong gituki dinhi sa akong lindog. Dunay uban nagsukna sa basihan sa mga komentaryo nga akong gihimo.
May e-mail nga gipadala sa akong duha ka pag-umangkon nga tu-a sa gawas sa Pilipinas. Ang usa gikan kang Nelson Anasco nga tu-a sa Port Moresby sa Papua New Guinea, ug ang usa gikan kang John Brian kon JB ngatu-a sa Saudi Arabia. Ang gikan kang Nelson pangumusta lamang kon naa ba ako ug si Misis nga iyang iyaan, sa maayong panglawas. Wa na siya mangumusta sa iyang mga ig-agaw nga among mga anak kay halos kada adlaw duna sila’y komunikasyon pinaagi sa Facebook.
Perosi JB, sa iyang e-mail wa gyud mosipyat nga molakbit sa paghisgot ug mga isyu nga may kalabutan sa mga nahitabo sa Pilipinas. Mao nga mas nadugangan ang akong interes nga mobasa sa iyang e-mail kay kini maghatag man ug oportunidad nga magbaylo-ay ug mga huna-huna labot sa mga isyu nga iyang gituki. Mao ni iyang e-mail sa ako-a:
“Good day nimo diha ‘Kol Vic. Musta man, okay kalang diha, wa ka gihasol ug sakit sa tuhod? Di ba ‘Kol na operahan ka sa tuhod tungod sa ‘septic infection’? Seguro ‘Kol Vic mao na to ang resulta sa kanunay nimog ipahimangno sa ako-a nga ‘Your foolishness will go home to your body.’ Di ba sa medyo bata-bata ka pa, walay pugong sa kaon, unya inom panagsa. Naa pa gyud daghan imbitasyon sa mga amigo ug mismo ikaw mangimbitar pud ug kaon sa mga higala nimo sa media ug sa gobiyerno kabahin sa imong trabaho. Pero ingon ni Mama ‘Kol Vic sa ulahi namo nga estorya sa cellphone, didto daw mo sa San Isidro, Davao Oriental human ang milabay nga Holy Week. Unya maayo ka man daw mikatkat sa Bonsai Forest nga bukid didto. He, he, he…sa Mt. Hamiguitan Natural Science Museum ra di-ay nga maabot ug sakyanan. Pero sa nakita nako nga mga hulagway ninyo nga gi-post ni Mama sa FB mura pud ug ning-adto gyud ka sa bukid sa Hamiguitan. Bitaw ‘Kol maayo nga nakasuroy pud ka didto kay naa kay naaninaw sa unsa ang makita kon aktwal ka nga ningsaka sa maong bukid.
“Lain pud ato ‘Kol Vic, kami diri sa Jeddah human na ug boto sa gitawag nga ‘overseas voting’ daghan-daghan mi nga mga Pinoy nga ningboto diri sa mga kandidato alang sa mga nasyonal nga posisyon sama sa mgaSenador ug Partylist nga mga pundok. Ako gibotohan tanan mga kandidato pagkasenador gikan sa Mindanao bisan uban nila ‘Kol Vic di nako gusto. Kini tungod kay sa pagkangalan nga taga Mindanao nagtu-o ko nga ilang iduso ang mga balaodnon nga makaayo sa atong lugar. Siyempre ‘Kol nag-una sa akong gibotohan ang mga taga Dabaw sama nila Bong Go, Bato dela Rosa.Unya sunod sila Koko Pimentel ug Dong Mangudadato. Kato pud taga Agusan nga lider sa mga trabahante ako sab gisingit. Ang uban sagol-sagol na subay sa akong naamgohan nga dunay mga maayong plataporma. Ang ako lang gamayng kabalaka ‘Kol mao ang posibilidad nga ma ‘lost in transmission’ ang among mga boto diri sa Saudi. Gani sa semana nga milabay migawas ang isyo nga kuno nag-atubang ug problema unsaon sa pagpadala balik sa Pinas sa mga balota nga gikan ‘abroad.’ Kini human dunay pasangil nga kuno wala’y kwarta nga magamit aron sa pagbayad sa koreo nga maghatud sa mga balota gikan sa nagkalin-laing mga nasud balik diha sa Pilipinas. Naa na ba reaksiyon ang COMELEC diha sa maong isyu ‘Kol Vic? Kinsa man nga ahensiya ang responsable sa pagpadala pagbalik sa mga balota, ang DFA, o ang COMELEC? Basin ug magtulodtulod ang duha, matingga gyud among mga boto ani. Basin di na hinuon maihap ug apil. Sayang ang mga boto nga gikan sa amo-a nga mga OFW.”
Wow! Hanep, grabe na gyud ang pagpakabana sa akong pag-umangkon nga si JB sa mga nanghitabo dinhi sa Pinas bisan pa nga siya tu-a sa Jeddah. Mora ug iya na gyud gilu-iban ang botelya sa beer nga kaniadto mao kanunay ang naa sa iyang utok ug gikambiyohan na sa mas seryuso nga huna-huna labot sa kalambo-an sa pangagamhanan sa Pinas.
Mao nga ako siyang gitubag niining mosunod:
“Dong JB, maayo’ng adlaw pud sa imoha diha ug sa imong mga kaubanan nga mga Pinoy. Salamat nga naningkamot ka nga makasalmot sa politikanhong kalihukan diri sa ato-a bisan nga naa ka sa layong nasud. Kini nagpasabot lang nga nagkaresponsable ka na ngaPinoy. Ayaw lang kabalaka Jibby kay subay sa mga giluwatang pamahayag sa Comelec diri sa Pinas, duna na’y kwarta nga ilang gigahin aron ipadala sa mga embahada ug konsolada sa Pilipinas sa nagkalain-laing mga nasud. Ang maong kwarta kuno ang gamiton aron sa pagbayad sa gasto sa koreo nga magdala sa mga balota nga gigamit sa ‘overseas voting.’ Ingon ang Comelec Doy nga wala lamang magkatukma ang interpretasyon sa komunikasyon tali sa taga DFA ug sa nauna nga hensiya. Mao nga migawas ang mga dili usab husto nga balita mahitungod sa kakulangug ‘budget’ sa pagpadala balik sa atong nasud sa inyong mga boto diha.Busa, ayaw kabalaka Jib nga di maihap ang inyong mga boto.Buot ipasabot Dong Jibby, kon modaog ang imong mga kandidato apil ka sa mga nakapadaog sa ilaha.
“Mahitungod pud sa imong mga gibutohan nga mga kandidato, possible pud nga parehas ang atong himuon.Moboto pud seguro ko sa tanan nga buot magsenador nga taga Mindanao kay wa ma’ypagduha-duha nga sila magtinguha gyud sa kaayohan sa atong dapit. Kini Dong JB bisan pa nga ako personal nga nasayod sa sobrang ka-estrikto sa usa sa maong mga taga Mindanao nga kandidato nga ang iyang security moraug gimando-an nga di siyapasaghiran bisan daplis lang. Pero tan-awon nato kon unsa ang iyang buhaton sa Senado kon siya modaog. ‘Let us to see’.” SEND
