Human sa eleksiyon kaniadtong milabay nga Lunes halos ang atensiyon sa mga tawo, lakip na pud ang ako-a, nakatutok sa resulta sa maong kalihukan.
Mao nga bisan ang pag-abli sa akong e-mail wa na nako maatiman. Mao nga kagahapon sayo sa buntag samtang naghagok pa ang ubang sakop sa balay gawas nako ug ni Misis, nagdali-dali ko ug abli sa akong computer aron susihon kon duna ko’y mga nadawat nga mga mensahe. Pero samtang nagpahiluna ko atubangan sa makina, nagpatempla na lang pud ko ug kape sa akong Misis. Subay sa naandan gidala ang kape didto sa lamesa kilid sa akong computer. Dinhi niining tungora nangalisngaw ang kahumot sa kapeng barako nga sinagulan ug ginaling nga bugas mais.
Mora ko ug na “high” nga ning singhot sa humot kaayo nga alisngaw nga mora ug nanuhotsuhot sa akong kinailadman sa lawas agi salapad nakong ilong. Mao nga human ang pipila ka lad-ok sa init nga kape naabli nausab ang akong e-mail box ug akong nakita nga duna’y pipila ka mga e-mail nga gipadala sa ako-a.
Una nakong gibasa ang gikan sa akong pag-umangkon ngasi JB kay sayod ko nga duna gyud ni siya isyu nga tuki-on sa ako-a human sa mga pangumusta. Wa ko masayop. Mao ni ang unod sa iyang e-mail:
“Good day nimo diha sa Dabaw ‘Kol Vic! Di na lang ko mangumusta sa imoha kay duda man pud ko sa imong itubag sa ako-a. Usahay ingon ka nga okay unya ako nalang nahibaw-an gikan sa akong Mama nga sakit daw imong hawak. Basin resulta na sa sobrang gamit… he, he, he… sobrang kayud nimo sa imong kakawan ‘Kol ba. Ka da Sabado ug ubang bakanteng adlaw adto ka man daw magyampungad sa imong kakawan nga nangalaya na tungod sa dugay nga init diha. Pero subay sa akong nabalitaan sa telebisyon ‘Kol nagsigi-sigi na man daw ug ulan diha, basin mauli-an na imong mga tanum. Mao nga basin pag-uli nako sa Agosto puhon makakutil na pud ta ug bahal uban sa lawot kaayo nga tsokolate. Kon duna nay durian unya naay hinog na,mosamot gyud kalami ang kinutil nga bahal. High blood pressure na pud imong kalaban unya ‘Kol. Bitaw ‘joke’ lang na ‘Kol Vic. Balo ko di ka kaayo moinom; usa ka tibuok adlaw lang matag semana. ‘Joke’ na sab ‘Kol.
“Lain sab ato ‘Kol Vic, mora ug gizerohan gyud ang oposisyon sa Senado kaniadtong milabay nga pinili-ay. Wa gyud madala ug ‘Bikoy series’ ‘Kol Vic no?Wa sab maminaw ang mga tawo nga hinimba matag Domingo sa mga pari ug mga Obispo nga sigi ug wali batok ni Presidente Duterte. Mora ba ‘Kol Vic ug giduso na hinuon sa mga tawo ang estilo sa pagdumala ni Presidente Digong kay ila man gibutohan ang mga kandidato nga gipaluyohan sa Presidente. Sa ako nga personal nga pag-analisar ‘Kol mora ug akong makompara sa dula nga basketball ang gigamit nga estratehiya sa administrasyon. Nagrecruit ug daghang reserba sa ‘bench’ aron maseguro nga kon magkina-unsa ug madiskaril ang una ug ikaduhang lima ka magdudula, ang mahibilin seguro nga iya sa ‘team’ gihapon. Unya ‘Kol Vic inay maghulat nga moatake ang kaatbang una magpahiluna ug depensa, ang gigamit sa administrasyon, seguro ubos sa ilang‘team manager’ nga si President Digong, mao ang estratehiya nga ang labing maayong depensa mao ang opensa. Mao nga sa akong tan-aw ‘Kol wa pa kaporma ang mga kaatbang nga mga kandidato sa ilang opensa, gi-unahan na sila sa atake sa administrasyon. Mao nga di nakapanukad ug maayo ang mga kaatbang nga pwersa. Ang resulta kulang na sa epekto ang ilang tirada.
“Nakita pa gyud nako ‘Kol Vic nga samtang ilang gibandilyo ang kuno panagkahi-usa sa oposisyon kini wa gimatuod sa ilang mga aksyon. Ti-aw ba nimo ‘Kol nga akong naobserbahan nga maayo na lang kaayo kon duna’y duha o tulo labing daghan ang magdungan sa pagpangampanya ang oposisyong mga kandidato sa Senado sa usa ka lugar. Gani, ang ilang giila nga lider sa oposisyon nga si kanhi Senador Mar Roxas wa gyud ko kabantay sa mga balita nga nakigdungan ug kampanya sa iyang mga kauban sa linya. Mismo si Bise Presidente Leni Robredo wala magsuroy-suroy sa tibuok nasud aron ikampanya ang iyang mga kandidato sa partido Liberal. Naa akong nakita sa balita sa telebisyon ‘Kol Vic nga kunohay ‘Meting de Avance’ sa oposisyon mora ug upat lang sa mga kandidato ang ning-adto aron motambong.
Unya mora pud ug nag ‘boomerang’ sa oposisyon ang paggawas sa usa ka Bikoy nga nagdaot sa pamilya sa Presidente. Inay makabungkag sa suporta sa administrasyon, ningsamot na hinuon ka solido ang mga nagpaluyo sa mga kandidato sa Presidente. Kon sa sabong pa ‘Kol Vic, sa akong tan-aw naunay sa ilang tari ang oposisyon. Unsaon nasakpan man ang nagmugna sa ‘web site’ nga gigamit aron didto gipakita ang nagtago sa mascara nga si alyas Bikoy. Unya dihang gipasakaan ug kaso ang nagmugna sa web site migawas dayon ang nagpaila nga si Bikoy. Ang sayop lang sa maong lakang ‘Kol Vic, sa akong personal nga opinyon, naisahan pud sa nagpailang si Alias Bikoy ang naggamit sa iyaha. Unsaon daghan man diay to ug ‘criminal record’. Mao nga wa na siya’y kridibilidad. Kon basihan nato ang akong nabalitaan sa TV ‘Kol buot daw to si alias Bikoy nga mosipsip sa bag-o pa nga milingkod si PDigong pinaagi sa kunohay paghupot ug mga dokumento nga magduot ni kanhi Presidente Noynoy ug sa iyang mga opisyales sa kalambigitan nila sa illegal nga druga. Pero napakyas kay wa man gisakyan sa bag-ong administrasyon.
Mao seguro ‘Kol nga mibaligtad pamasin nga makakwarta. Kon ang oposisyon mao ang nagpaluyo kang alias Bikoy di sori nalang sa ilaha. Nabiktima sila sa ilang kaugalingon nga taga. Hinuon ‘Kol ikaw kabawo nga hugot kining gipanghimakak sa oposisyon nga sila ang naa sa luyo ni Bikoy. Mao nga kon dili sila, kinsa man diay?
Maayo kaayo nga pagkatuhog ni JB ang maong isyo. Mora na hinuon pud ug siya na angtig-analisar sa mga nanghitabo dinhi sa Pilipinas. Seguro tungod kay panahon nga wa siya’y trabaho didto pulos na lang ang Pilipinas naa sa iyang huna-huna. Di man pud sila maka ‘gig’ didto kay basin makasala na hinuon na maputlan pa sila ug li-og.
Mao nga tungod sa kadetalyado sa mensahe ni JB ug sa isyu nga iyang gituki sa ako, ingon na lamang niini ang akong gitubag:
“Dong JB, mora man ug imo na nga nabasa ang wa pa nako gihuna-huna. Kay tanan nga imong gisulti mao man sab unta to akong isulti sa imoha. Mao nga usa ray ako ika-ingon sa imoha, ‘Gipamulong mo na Doy’.”
