Kagahapon sa buntag wala pa’y alas 10 ang takna dihang miabot sa balay ang usa ka multi-cab nga miparada sa dapit sa ganghaan sa akong koral. Nakurat ko kay ang nanaog bana man sa akong pag-umangkon nga anaa magpuyo sa may Tahimik Drive sa Bangkal niining dakbayan – si Edward Emuy.
Nagngisi kini nga misulod sa among ganghaan ug dali nga mitunol sa iyang kinumo nga kamot inay binukhad aron molamano agi ug pangumusta. Kasabot dayon ko nga usa kadto ka timaan nga nagtuman si Edward sa health protocol nga gipatuman karon nga panahon sa pandemya.
Sayo man ka nga nasuroy dinhi sa among bukid Doy, unsa mang klaseng hangin ang nagpadpad nimo dinhi?
Tubag sab ni Edward: Unsa pa di ang makalibre ug kape sa inyoha kay balita nako gikan man dawn a sa BARMM ang imong kape nga kinuha sa tiyan sa milo. Tinuod na ‘Kol Vic? Aw, tinuod kaayo kon misalig ka sa imong amigo nga anaa sa NGO nga maoy naghatag sa ako aning kapeha, apasumpay nako kang Edward. Aw, kon mao na unsa pa man ato gihulat ‘Kol Vic, mangape na ta. Igo sab migawas akong Misis nga nagdala sa usa ka tasa sa nangalisngaw sa kahumot ug kainit sa kape’ng kuno gikan sa tiyan sa milo, usa ka mananap nga mangaon sa bunga sa kape ug kon kini ila na nga igawas isip hugaw, ang mga liso dili mahilis pero wala nay mga panit ug pwede na nga hugasan ug ibuwad sa init sa adlaw dayon sangagon.
Uy, maayong buntag nimo ‘Tie Nene, pangatahuran ni Edward sa akong Misis. Unsa man wa nay lain ana imong dala nga kape kay ako sabayan sa pagpangape si ‘Kol Vic? Tubag sa akong Misis: Naa pa Dward. Sige magkuha ko ug usa pa ka tasa ani aron inyong kalingawan ug higop samtang magkulukabildo mo dihang duha sa among nataran. Tuod man, wa ray usa ka minuto nabalik na si Misis dala ang laing tasa nga puno sa mainit kaayo nga kape. Mao nga nagpahiluna na mi sa usa ka lamesa nga mas hamugaway ang gidak-on ug didto nagsugod ang among estorya.
‘Kol Vic, kabalo ko kon si kinsa to imong gipasabot nga posibli nga mao ang iduso nga kandidato sa pagka Presidente sa administrasyon. Subay sa imong column kaniadtong milabay nga Huwebes akong nahinumdoman nga usa ka higayon ana sa balita sa telebisyon, ako man gud nakita ug nabati si Ramon Ang, ang Presidente ug CEO sa San Miguel Corporation nga nagdayeg sa kakugihan ug ka seryuso sa maong tawo sa iyang trabaho isip usa ka kalihim sa administrasyon. Gani kini nga kaseryuso ug ka kugihan sa maong Kalihim iya gihapon nga gihimo bisan pa man nga ang iyang pamilya sobra-sobra ang kahamugaway sa panimuyo. Mao nga sa dihang akong nabasa ang imong lindog Rough Cuts kaniadtong adlawa dali nako nga naaninaw ang tawo nga imong gipasabot tungod kay ako sab dunay ingon niana nga pagtu-o sa iyang mga plano.
Dali nakong gipangutana si Edward kon kinsa sa iyang pagtuo ang akong gipasabot nga tawong posibli nga sabakon sa administrasyon. Tubag sa ako ni Edward, Si Mark Villar ‘Kol Vic kay mao man na siya ang kalihim nga walay pupanagana nga ginganlan ni Ang nga seryuso ug kugihan kaayo sa iyang trabaho ug nga kini iyang gihimo luyo sa kamatuoran nga ang iyang amahan mao ang giila nga labing adunahan nga Pilipino karong panahona.
Unya Dward, agree ka sa ako-a aning akong panahom? Tubag ni Edward, dili kaayo sinto por sinto nga konpormi ‘Kol Vic. Pero motuo ko nimo nga posibli kini nga mahitabo kay luyo sa pipila ka mga ginagmay nga pasangil sa mga korakot kuno sa Department of Public Works and Highways (DPWH), wala pay matawag nato nga makabungog nga pasangil nga may mga timailhan sa kamatuoran. Gani ‘Kol Vic, sa dihang dunay migawas nga mga huhungihong sa pangurakot sa maong ahensiya inay manghimakak si Mark Villar, ang una niyang gihimo mao ang pagpaimbestigar sa maiong pasangil ug sa pagpaneguro nga kon kini mosangpot sap ag-ila sa mga naghimo ug kahiwi-an dili siya magpanuko sa pagpalagpot sa maong mga tawo. Ug sukwahi sa mga nanglabay nga mga kalihim sa maong departamento,si Villar wala pa gyud gipatawag sa Kongreso alang sa usa ka imbestigasyon sa mga kuno anomaliya o dili ba sa wala’y katumanan sa bisan usa nga proyekto sa gobiyerno ubos sa iyang panahon.
Kon mao na Dward, posibli pud ka mosuporta kang Villar kon siya gyud ang padaganon sa administrasyon? Posibli ‘Kol Vic, posibli pud dili. Depende kon kinsa iyang kaatbang. Pero kon mahitabo to imong panglantaw sa dagway sa lakaw sa politikanhong plano ni Mayora Sara, basin mopaluyo ko sa taga atu-a.
Sa kasamtangan ‘Kol, manguyogpos lang una ko ug maniid sa panahon kay basin diay mahitabo pud to ang imong gihulagway nga posibling sitwasyon sa politikanhong plano sa administrasyon nga magpahimutang kang Mayora Sara sa usa ka sineguro nga kadaugan kon siya ato gyud ang gilantaw nga kandidato pagka Pangulo ubos sa landong sa administrasyon.
Wala baya ko kalimot sa imong panglantaw sa lakang kanhi ni karon Presidente Duterte ‘Kol diin nag-ingon ka sa ako-a nga bisan human na ang deadline sa pagpasaka ug kandidatura pagka Pangulo Sa kaulahi-an si Duterte mahimo na sab nga kandidato human sa substitution period. Unsa man karon ‘Kol, di ba Presidente na si Digong?
