fbpx Press "Enter" to skip to content

NUNOIT SA ALISNGAW SA KAPE

Vic N. Sumalinog

MEDYO taud-taud na nga wala ko kadawat ug mensahe gikan sa akong mga paryente nga atua sa gawas sa Pilipinas. Apan nakurat ko kaniadtong milabay nga adlaw kay sa pag-abot nako sa balay gikan sa downtown sa dakbayan sa Dabaw nag-abli ko sa akong computer aron susihon ang akong e-mail box.

Didto akong nakita ang usa ka taas nga e-mail message gikan sa akong pag-umangkon nga si Nelson Anasco nga tu-a karon nagtrabaho isip sales manager sa usa ka wood processing and exporting company didto sa Papua New Guinea. Ang iyang kompaniya usa lamang sa daghan kaayong negosyo didto sa usa ka magpapatigayon nga Pilipino.

Matud ni Nelson sa iyang mensahe sa ako-a:

“Kol Vic, mora ra pud ko ug naa gihapon sa Pilipinas labi na sa atong dakbayan sa Dabaw. Kini tungod sa mga on-line edition sa mga mantalaan lakip na ang sa imong ginasulatan diha sa Dabaw – ang Mindanao Times. Mao nga sa kanunay akong mahibaw-an ang mga katikaran labi na sa pulitika diha sa nasud ingon man sa lokal nga gobiyerno.

“Mora ug tukma gyud kaayo ang imong panahom ‘Kol Vic nga si Mayora Sara di gyud modagan sa pagka Presidente sa nasud ug nga bisan siya nagpasaka sa iyang kandidatura aron magpasubli sa pagka Mayor sa atong dakbayan kini iyang biyaan ug itugyan ngadto sa su-od niya nga tawo aron siya mo-substitute sa usa ka nasudnong pwesto.  Husto gyud ka kay kaniadtong naipo na ang tagal aron maghulip ug kandidatura o di ba moluwat gikan niini, si Mayora Sara mipasaka man sa iyang kandidatura pagka Bise Presidente. Seguro, ang wala nimo damha mao ang pagpasaka ni Mayora ubos sa landong sa Partido Lakas-CMD ni kanhi Presidente Gloria Macapagal-Arroyo sukwahi sa gilauman sa daghan nga naghandom nga siya modagan sa pagka Presidente ug ubos sa PDP-Laban diin ang honorary chairman mao ang iyang amahan nga  si Presidente Rodrigo Duterte. Dinhi nga aspeto ‘Kol Vic wa ka masayop, wa pud mahusto. Ngano? Kay wa ka man magpagawas ug pagtagna nga kini mao ang mahitabo. Hinuon, tukma kaayo ang imong panahum nga si Mayora Sara makig-abin kang Bongbong Marcos , usa ka lakang sa babayeng politiko sa Dabaw nga maghatag ug dakong kasegurohan nga siya modaug gyud sa pagka Bise. Pero, parehas pud sa imong huna-huna ‘Kol nga di sab ko motu-o nga walay kalibutan ang amahan ni Mayora Sara nga si Presidente Duterte mahitungod sa maong lakang. Gani ‘Kol Vic posibli pud nga kini kabahin sa usa ka halapad nga estratehiya nga gilatag sa partido ni Presidente aron usab maseguro nga magpabilin sa gahum ang mga tawo nga ilang kaabin sa politika.

“Bisan gani kining kalit nga pagsulpot ni retiradong Tenyente Heneral nga si Antonio Parlade isip kandidato sa pagka Pangulo kabahin kini sa ‘panggulo’ nga sistema  nga gi-andan aron kon kinahanglan gamiton kini andam na nga ipahiluna. Sama sa pagdagan ni Sen. Bong Go ‘Kol Vic; di ba klaro man nga ang tanan nga nahitabo sa kandidatura ni Senador Bong ubos sa kumpas sa kamot ni Presidente Digong. Unya wa pud siya nagdala sa Partido PDP-Laban. Inay ang partido ni kandidato sa Senado Greco Belgica mao ang iyang gisakyan. Wa pud siya’y Bise Presidente ug kusog kaayo ang alisngaw sa mga tabi nga si Mayora gihapon ang iyang dalhon.

“Ambot kaha Uncle kon susama ta ug hunahuna nga si Parlade, pag-abot sa tukmang panahon si Sara pud ang iyang dalhon nga Bise Presidente? Seguro, sa pagsugod na sa kampanyang pormal ang maglabu-labo ani ug banatay sila na lang si BBM, Leni Robredo, Isko Moreno, Ping Lacson, ug Manny Pacquiao. Kana kon dili idespatsa nila Isko ug pakyaw sila si Dr. Willie Ong, ug si Kongresista Lito Atienza pabor kang Sara. Mahibaw-an ra man gihapon ni nato sa di madugay.”

“Dinhi ra sa ko kutob ‘Kol Vic kay mora ug nasuko akong computer sa akong mga gimessage sa imo. Seguro pabor ni nga computer sa usa sa mga kaatbang ni Mayora Sara. Bitaw ‘Kol Vic joke lang. Naa diay ko kinahanglan nga humanon nga report para sa among Presidente sa kompaniya. Mag-email ra ko nimo ug usab ug sa kanunay basahon nako ang imong column sa on-line edition aron sa kanunay masayran nako ang mga katikarang politikanhon diha sa atu-a.  Seguro ‘Kol di pa ko kauli diha sa atu-a karong Disyembre. Naa pa mga limbit diri sa opisina.”

Sa taas kaayo nga e-mail sa akong pag-umangkon nga tu-a sa Papua New Guinea mubo kaayo akong tubag:

“Sigi Nel, padayon lang ko ug sulat diri mahitungod sa nagkadaiyang mga isyu aron pud imo masayran diha ang mga katikaran. Hangtud sa sunod nimo’ng e-mail. Uncle Vic.”

Share this post:
error20
fb-share-icon20
Tweet 20
fb-share-icon20

Powered By ICTC/DRS
WP Twitter Auto Publish Powered By : XYZScripts.com
error

Enjoy this blog? Please spread the word :)

Facebook20
Instagram20