fbpx Press "Enter" to skip to content

NUNOT SA ALISNGAW SA KAPE | Bisan unsa na lang gamiton sa pamolitika

 

 

 

UNA ako migawas sa balay aron magpakaon sa mga langgam nga naanad na nga maniba ug liso sa dawa sa akong nataran matag buntag, nagtimpla una ko ug kape, 3-in-1 lang kay sayo pa man ug wa pa kaandam akong Misis sa natibong kape nga mao ang akong paborito nga imnon sa balay nako sa bukid.

    Bisan pa niini nangalimyon gihapon sa kahumot ang bag-ong tinimpla nga kape  ug nanuhotsuhot sa akong naglisngag nga ilong. Samtang mao kini akong gihimo nagkalingaw pud ko ug scroll sa akong cellpnone aron susihon kon dunay mga bag-ong mensahe sa Messenger ug Facebook. Hilabihan nakong kakurat kay usa sa mga mensahe wala gyud nako paabota. Gikan sa akong pag-umangkon nga si Jeffrey Canton, usa ka marinero ug dughaydugay na mi wa gyud mag-abot kon makahigayon ko nga mopauli sa Cebu.

     Ako dayon ning gibasa ug sa sinugdanan pangumusta lang ug nakisayud kon unsa na ang akong kahimtang diri sa Dabaw sanglit matud pa niya grabe kadaghan sa nataptan ug CoviD 19 dinhi sa atong lugar. Nahibaw-an man gud nako nga si Jeffrey, human sa milabay nga pasko, nataptan usab ug CoVid pero dili grabe. Mora ug mga usa lang siya ka semana sa usa ka pribadong hospital uban sa iyang anak nga natakdan sab niya sa maong sakit. Sa akong huna-huna nabalaka siya sa ako-a kay may edad na baya ta ug nga posibli nga dali na matakbuyan sa mga virus sama sa CoViD. Pero dihang akong gi-abli ang attachment nga iyang gilakip sa iyang mensahe nakurat ko kay diay, nanghambog pud ang akong pag-umangkon nga nakabalik na siya ug sakay ug nga na promote na siya isip kapitan kon Master sa ilang barko. Duna pa lang mga 46 anyos ang panuigon ni Jeffrey ug nga halos duha ka tuig na siya nga mipasar sa board exams sa pagka kapitan. Pero karon ra siya nakadawat sa maong posisyon isip kapitan sa barko. 

     Mao nga nakaingon ko nga seguro human sa kabalaka nga gibati sa iyang pamilya dihang nagkasakit siya ug CoViD, mao na sab ni ang bali regalo sa iyaha. 

     Ako dayon siyang gibalusan ug message agi ug pagpahalipay sa iyaha ug sa iyang pamilya. Ang pamilya man gud ni Jeffrey nga anak sa akong manghud nga babaye, pulos mga marinero. Iyang papa chief engineer; iyang manghud usa usab ka chief engineer ug ang iyang lain pang manghud, Chief mate pa ug naghulat sab ug promosyon kay pasado na man pagka Kapitan.

     Dako ang akong kalipay sa ilang kapalaran kay kaniadto kami sa iyang mama halos di maka-eskuwela sa kalisud. Karon medyo giabyan sila sa maayong swerte.

     Congratulations Don Jeffrey!

                                                       ************************

     Okay, tama na una ning ginagmay nga panghambog. Ngadto ta sa seryuso nga butang sama niining umaabot nga eleksiyon ug sa tinguha sa pipila ka mga tawo nga makakab-ot sila o di ba hinuon ang ilang manok sa pwesto nga maoy ilang gusto.

     Kung nakamatikod mo bisan ang pagkakuha ug bulawan nga medalya sa Pilipina nga weightlifter nga si Hidilyn Diaz, gigamit na aron lang pagdaot sa ilang mga kaatbang. Sama panaglitan sa usa ka Post sa Facebook nga nag-ingon nga si Diaz mao lang ang nag-inusara nga babaye nga nakabuntog sa China ug nga siya ang ikaduha nga Pilipino nga milampos sa pagpildi sa China. Wala ginganlan kon kinsa ang usa pero klaro ang tumong sa maong nag Post nga ang iyang gipasabot mao si Anhing Presidente PNoy Aquino III kinsa nagtaral sa China didto sa Permanent Court of Arbitration tungod sa panagbangi sa Pilipinas ug Tsina sa West Philippine Sea. Ang resolusyon sa maong tribunal pabor sa atong nasud apan daw wa kini gipursigir ni Presidente Duterte.

     Mora ug husto ang panahum sa mao nga nag Post sa social media sa maong kadaugan ni Hidilyn kay tinuod man nga ang iyang gibuntog sa maong kumpetisyon usa man ka babaye nga Tsino. Lamang, nakalimtan sa nag Post sa maong panahum nga ang head coach ni Diaz usa usab ka Tsino ug nga siya giabagan lang sa mga Pilipinhong coaches lakip na ang doctor nga nagbantay sa panglawas sa atong atleta.

     Kon ingon niana ang linya sa panghunahuna ang atong sundon  basin pud maakasuhan ug high treason ang coach ni Hidilyn nga Intsik. Tiaw mo ba nga iyang gitabangan ang usa ka Pinay nga pildihon ang ilang atleta nga nagsimbulo sa nasud sa China!

     Mao ni makadaot sa Pilipinas ba. Kay kon mahitungod na gani sa politika bisan unsa na lang, legal man o illegal, makatarunganon man o dili, buhaton gyud aron lang maangkon ang gilantaw nga ambisyon sa natad sa politika. Bisan na lang kinsa ug unsa gamiton makuha lang ang personal nga interest sa kinabuhi. Wow!

     Bisan gani ang mga personal nga sakripisyo ni Hidilyn aron lang makab-ot ang iyang gidamgo nga medaalya gibutangan ug kolor politika.

                                                                  

                              

Share this post:
error20
fb-share-icon20
Tweet 20
fb-share-icon20

Powered By ICTC/DRS
WP Twitter Auto Publish Powered By : XYZScripts.com
error

Enjoy this blog? Please spread the word :)

Facebook20