fbpx Press "Enter" to skip to content

NUNOT SA ALISNGAW SA KAPE | Seguro, Mag ala San Pablo una sila

 

 

 

Vic N. Sumalinog

SAYO pa ko sa buntag kagahapon sa dihang mibangon aron sugdan akong adlaw. Ug sama sa naandan mas nauna pa gyud akong Misis kay nahimo na man niyang kinaiya nga mag rosaryo matag sayo sa buntag kada adlaw.  Pero sanglit human na man siya sa iyang tulumanon, pagkakita ni Misis nga ninggawas ko sa among kwarto, nagtimpla gilayon kini ug kape kay nahibawo na man siya nga mao ni akong unang buhaton matag buntag – ang magkape.

     Ug samtang akong gihulat nga igo nga mahigpop ang init kaayo nga ilimnon, ako gikalingawan ug simhot ang alisngaw sa kape nga mora ug naghatag nako’g kalit nga kabaskog. Unsaon nga mao man ni usa sa akong “major vices”. Ug samtang nalingaw ko sa nangalimyon nga alisngaw akong gisusi akoang celfone aron makita kon naa ko mga mensahe sa Messenger o di ba sa Facebook. Tuod man naa gyud ug usa na niini ang gikan sa akong pag-umangkon nga si John Briann kon JB nga tu-a karon sa Saudi Arabia nanginabuhi isip usa la kawani sa restaurant didto.

     Matud ni JB sa iyang pasiuna nga mensahe: ‘Musta na ‘Kol Vic? Musta sila auntie Nene ug akong mga cousins? Unsa man to ilang gi post sa Facebook nga mga picture nga daw busy kaayo sila sa ilang gitrabaho diha sa inyong gate? Human na akong kontrata ‘Kol sa Disyembre puhon. Basin kauli ko diha wala pay pasko o di ba sa pagsulod sa bag-ong tuig 2022. Maka bonding na ta ani. Pero balita nako ‘Kol molingiw na man daw ka sa beer ug ubang ilimnon. Nagbinut-an na diay ka ‘Kol? Bitaw, seguro kung naa na tay “Edad” bisan ato ni makalimtan pinaagi sa “Rosario” mosamot na gyud nga di na makaya nga molaklak. Kami na lang seguro ani sa akong mga ig-agaw diha ang mag tournament sa pagtungga sa beer pag-uli nako ‘Kol? 

     Bitaw ‘Kol Vic mora ug maabotan na ko ug eleksiyon ani dinha sa ato. Maayo unta kon makaabot pa ko sa deadline sa pagparehistro. Di na man gud ko kabuto ‘Kol kay napaso na akong rehistro. Mora ra ba sa akong tan-aw ‘Kol Vic init ug makalingaw kining moabutay nga piniliay. Karon pa lang gani nga wala pay “filing” sa kandidatura sigi na ug binakbakay ang mga trolls pabor o kontra sa nagpalihok nila.  Ang administrasyon naningkamot sa pagpakita nga sukwahi sa pasangil nga kini walay nahimo, gipagawas ang mga hulagway sa daghan ug dagko nga mga infrasraktura nga nahuman na ug nasugdan na. Sa samang higayon ako pud kanunay nga mabasahan ug madungog sa mga balita nga balusbalus lang ang mga binakbakay sa mga posibleng nag-ambisyon sa pagka Presidente. Gani ‘Kol Vic nahibulong ko’g dako nga kalit lang mibaligtad si Sen. Manny Pacquiao. Human mibiya sa grupo ni kanhi Bise Presidente Jejomar Binay ug mitapon ngadto kang Duterte, karon nagpakita na sab ug mga pagsungag sa iyang amigong opisyal nga maora ba ug naa siya’y nahimo nga makaayo sa katawhan. Sa karon pulos lang estorya ug wa pa koy nadungog nga mga balaod nga gituboy niya sa Senado nga makatabang sa kinatibuk-an sa katawhan. Wa gani sa paugnat sa kusog nga naa siya nasakop. Di ba ‘Kol iyang ginganlan ang DOH nga daghan ang palusot ug korapsyon sa mga transaksiyon ani sa pagpalit ug mga bakuna ug mga kagamitan aron respondihan ang pandemya?  Seguro natulog lang pud ni siya sa Senado sa dihang gi-imbestigahan sila si Kalihim Duque, o di ba nagpraktis pa si Manny para sa sunod niyang away.

Sa kaso pud sa oposisyon ug mga kritiko sa administrasyon mora ug migawas nga mas nalipay sila nga namatay si kanhi Presidente PNoy Aquino III inay dako nga nagsubo. Tan-awa ‘Kol wala silay undang sa pagdayeg sa kamaayong Presidente ni Noynoy ug sa iyang maayong pagdumala sa atong nasud. Pero di na makadungog si PNoy aning tanan nga pagbola nila. Ngano man nga karon nila kini gihimo? Seguro ‘Kol kay naningkamot sila nga mabawi ang Malacanang gikan sa karon nagdumala ani ug sa posibli nga i-enduso sa Presidente. Di ba ‘Kol Vic nga kon basahon nato ang tanan nilang paghulagway kang Noynoy, mora na siya ug santos nga gi deklara sa Santo Papa.  Matud pa ni Ginuong Narciso Santiago, bana ni anhing senadora Miriam Defensor Santiago, perting dayeg sa mga tawo sa iyang namatay nga asawa kon knus-a di na kini niya madungog,

     Agi ug tubag nako kang JB ako siyang gibalusan ug mensahe: Ana gyud na Doy. Seguro nagtuo ang mga taga oposisyon nga kon unsa ang kamaayong tawo ug kabuotan ni PNoy ug katakos sa pagdumala sa nasud subay sa ilang pagtu-o, seguro namasin ang mga naa sa oposisyon nga ang maong mga kinaiya sa namatay nga kanhi Pangulo mobag-id ug motakud sa ilahang mga kandidato ug maoy magdala nila sa kadaugan. Pero mahitabo ba na? Kon sa ilang pagtuo santos ang namatay nga Presidente, sanglit kini mao ang ilang giila nga inspirasyon ug lider sa ilang pundok, masantos pud sila ug apil.

     Pero ang kamatuoran Jibby, kon unsa ang usa ka tawo mao na na siya. Kon duna ma’y kausaban paingon sa kaayohan kinahanglan una nila nga pamarisan si San Pablo kinsa usa ka tiglutos sa mga Kristohanon una kini nakumbinse nga magbag-o ug moabin  ug mosunod ka Kristo.. Kinsa man kaha Jib ang ingon niana nga tawo sa oposisyon? Ilhan na man na silang tanan. Ambot lang uroy!!

                                                                                

Share this post:
error20
fb-share-icon20
Tweet 20
fb-share-icon20

WP Twitter Auto Publish Powered By : XYZScripts.com
error

Enjoy this blog? Please spread the word :)

Facebook20
Instagram20
RSS