fbpx Press "Enter" to skip to content

NUNOT SA ALISNGAW SA KAPE | Bitaw no; ngano kaha?

 

 

 

Vic N. Sumalinog

KANIADTONG Huwebes sayo pa sa hapon nagsugod na ug ulan sa amo-a nga barangay. Mao nga wa na ko’y nahimo kon dili biyaan ang akong gitrabaho ug misulod na lang sa balay.

Sanglit sayo pa man ug wala pay programa sa telebisyon mahitungod sa balita, lokal man o nasyonal, nagkalingaw una ko ug “scroll” sa akong FaceBook page aron susihon kon duna ba’y mga “posts” nga mahinungdanon alang kanako o di ba hinuon makahatag nako ug mga bag-ong inpormasyon sa lakaw sa kalibutan karon nga panahon sa pandemic sa Corona Virus Disease 19 kon CoViD 19.

Niadtong adlawa ang sentro sa mga balita, ma FaceBook man kini o sa radio, telebisyon o mantalaan man, mao na usab ang mga kontrobersiya dala sa pagkakaplag ug paggamit sa mga bag-ong bakuna alang kuno sa paghatag ug “immunity” sa katawhan sa kalibutan batok sa CoViD.

Usa na niini ang giingon nga pagkadiskaril sa kasabutan nga baligyaan ang Pilipinas ug mga napulo ka milyon ka vial sa bakuna gikan sa Pfizer, usa ka kompaniya nga tighimo ug mga tambal nga iya sa mga Amerikano. Ang laing bug-at nga isyu mao ang giingon nga delikado nga “side effects” sa bakuna ngadto sa pipila ka mga tawo hinungdan nga ningsamot ang kalangay sa pagpalit ang atong gobiyerno sanglit gikinahanglan nga tun-an sa mga eksperto kon ang bakuna nga epektibo sa ubang nasud nga dunay kalahi-an ang klima, mahimo ba usab nga epektibo dinhi sa Pilipinas. Dugangan pa sa pagpanghilabot sa mga politico ug ubang sector sa kritiko sa administrasyon nga nagduda sa kahigayonan nga dunay pagpangurakot sa pipila ka mga tawo’ng anaa sa puwesto, misamot na ka lugaw ang transaksiyon sa pagpalit sa bakuna batok CoViD.

Luyo sa pasangil nga kuno ang pagpaltos sa kasabutan pagbaligya nganhi sa Pilipinas ug bakuna sa Pfizer hinimo-an ni Kalihim Francisco Duque III sa Department of Health, mipagawas na ug direktiba si Presidente Rodrigo R. Duterte ngadto sa Kalihim sa DOH nga opisyal nga tubagon ang pasangil aron maklaro na ang matuod nga hinungdan sa pagka unsiyami.

Mao nga sa pagtan-aw nako sa akong FaceBook Page, temporaryo nga wala una nako gitagaan ug pagtagad ang mga balita kalabot sa maong isyu. Inay niini, ako nga gisusi ang mga nagkadaiyang “posts” ug mga mensahe sa mga tawo nga sa akong pagtan-aw akong magamit sa pagsulat niining lindog nga binisaya.

Apan sama sa nanglabay nga mga adlaw mora na ug walay bag-o nga mga “posts” sa Facebook nga mapuslanon alang sa ako-a. Hinuon, daghan sa akong nakita ug nabasa mao ang pagpaambit sa mga FaceBook account holders sa ilang mga personal nga kasinati-an ingon man ang pag-awhag nga kanunay mangaliya sa Ginoo aron katabangan nga malayo sa kahigayonan nga takboyan sa CoViD. Wala ko’y pagsupak sa maong gihimo sa mga FaceBook subscribners. Sanglit halos pare-parehas lang ang tema sa mga “posts” ningbalhin ko didto sa Messenger portal.

Husto nga ningtawag ako’ng Misis nga mangape una mi kay medyo tugnaw ang panahon gumikan sa ulan.Tuod man pagduol nako sa lamesa nangalisngaw sa kainit ang kape nga 3-in-1 ingon nga nangalimyon kini sa kahumot sa dihang ako nga gihinayhinayan sa paghigop.

Human halos matunga nako ang tasa sa kape, ningbalik ko sa pagbasa sa mga personal nga mensahe didto sa Messenger. Ang nakatawag sa akong pagtagad mao ang mensahe sa akong pag-umangkon nga nurse didto sa London. Una niya ako nga gikumusta kay iya kuno nga nabati ug nakita sa telebisyon ang balita nga halos wala na matangtang gikan sa “Top 5” ang Dakbayan sa Dabaw sa mga dapit sa Pilipinas nga daghan kaayo ug gitakboyan sa CoViD matag adlaw sulod na sa halos usa ka bulan nga milabay.

Ang akong pag-umangkon nga si Alayssa nagtrabaho sa usa ka ospital sa London. Ang iyang bana nga usa ka Italyano ug nurse usab nga kauban niya sa trabaho, nagpositibo sa maong sakit. Hinuon naayo na kini samtang si Alayssa wala maigo sa CoViD 19, kaluoy sa Ginoo.

Matud sa akong pag-umangkon nga ang London gipahimutang sa usa ka “hard Lockdown status” human mapanid-I nga ningbalik sa pagsaka ang mga kaso sa CoViD 19 sa maong dapit.Gumikan sa “hard lockdown” mikalma usab ang pagkuyanap sa sakit didto sa maong dakbayan sa Englatera.

Mao nga medyo naglibog siya ngano nga bisan sa kuno pagpahiluna sa Dakbayan sa Dabaw sa estrikto kaayo nga pagbantay sa mga checkpoints ug pagpatuman sa mga health protocols sa lokal nga kagamhanan mora man ug walay alibyo ang sitwasyon sa dakbayan.

Gani iya pa nga gi-share sa ako-a ang usa ka “FaceBook” post nga nagdala niini nga mensahe: “Grabe kaayo sa Dabaw no; Nagpusotpusot ang mga Executive Orders gikan sa mayor aron gyud hugot nga ipatuman ang mga mando sa gobiyerno mahitungod sa oagsanta sa CoViD; unya nagbutang pa gyud ug lungon aron pagpahinumdom sa katawhan nga kon sila dili magpuyo sa balay ug mag-amping, basin sunod nila padulgan sulod na sa lungon. Pero, ngano Number 1 sulod sa makadaghan nga higayon and Dabaw sa listahan sa daghan ug mga bag-ong kaso sa CoViD?”

Ngano kaha Tiyo Titing (Angga nako sa Cebu)? Sa Cebu, human giadto-an ni DENR Sec. Roy Cimatu sunod sa mando ni Presidente Duterte, wa na gyud makita sa talaan sa mga daghan ug CoViD. Hadlok seguro ang mga taga Sugbo nga kanunay mabutang sa “headline” sa mga balita Tiyo?

Basin panahon na Tiyo nga ipadala si Cimatu diha sa inyong siyudad aron mapakgang na ang dili maayong sitwasyon diha sa inyoha. Unsay imong huna-huna Tiyo?

Sa ilawom sa akong alimpatakan nakapangutana pud ko: Bitaw, ngano kaha wa kini gihimo sa Presidente? Kamo, unsa ang inyong huna-huna?

 

Share this post:
error20
fb-share-icon20
Tweet 20
fb-share-icon20

error

Enjoy this blog? Please spread the word :)

Facebook20
Instagram20
RSS