fbpx Press "Enter" to skip to content

Nunot | Wa nay ‘kaya’ Doy

Dugay mi’ng nakapauli gikan misimba kaniadtong Domingo. Kini kay wa man mi makapamalengke sa Sabado kay dunay gianhi sa downtown. May gipamalit si Misis para sa Pasko puhon.

Ang desisyon nako mao nga sa pagkahapon na lang maglimpiyo sa sakyanan una magsulat sa akong mga column para sa adlaw nga Martes ug Miyerkoles. Gikapoy ko ug sunod-sunod ni Misis samtang namalengke kay dugay kaayong manghangyo sa presyo sa gulay sa merkado didto sa Calinan. Kapoy pa gyud bitbit sa bayong nga sudlanan sa napalit.

Kuntento na sab ko nga di magluto ug sud-an sa balay kay adunay sobra nga law-uy sa milabay nga gabii nga gibutang sa refrigerator. Busa nagrelax ko pinaagi sa pagtan-aw ug DVD movie. Pero wa pa gani maplastar ang akong lubot sa sofa miabot si JB, ang karaho nakong pag-umangkon nga wa motunga kaniadton milabayng Domingo kay duna kuno’y giadto sa Digos.

“‘Kol, maayong buntag nimo diha. Mora ug husto gyud ako tayming ani ba. Nagrelax ka diha ug tingkape na pod. Seguro ko magpatimpla ka ug kape kang Auntie Nene karon taudtaud.”

“O’ Doy, nabanhaw man lagi ka. Wa man ka niadtong milabay nga Domingo. Kumusta man imong gilakaw didto sa Digos?”, dali nakong pangutana kang JB. Tubag sa akong pag-umangkon, “Malas ‘Kol; pildi mi.”

“Unsa, nanabong diay kang tontoha ka didto sa Digos? Kaingnon nako ug duna kay importanteng giadto didto kay layo man tong lugara.” Tubag ni JB, “Ah, palusot lang gud to ‘Kol aron tugtan ko ni ‘kumander’ kay allergic na siya sa akong panabong kay kuno usahay magamit na nako akong sweldo sa sabong ug wa na ko’y mahatag sa iyaha.”

“Unya karon, ang imong gipildi didto sa Digos, di to nimo sinikwat gikan sa imong sweldo?” Matud ni JB nga alanganin sa iyang tubag, “Aw, mao gyud ‘Kol. Pero dugay to nako nga ipit-ipit sa akong pitaka matag sweldo o di ba matag higayon nga makadaog ko. Di nako ihurot ug hatag kay usahay kalitkalit man gud ning galgal sa sabong ‘Kol, Lisod pod balibaran; mora pod ta ug addict sa shabu ngs motumaw gyud ang atong pagkinahanglan.”

“Okay Jib, naa na gyud atong kape. Nag-aso-aso ang kainit ana. Basin mapaslot ang imong wait sa init. Gikan pa gyud na sa gipabukal sa imong Auntie.”

“Mao gyud ni akong gusto anhian sa inyohang balay ‘Kol. Di gyud ta mapasmo kay makapainit man gyud ta.” Sumpay nako kang JB, “Ana gyud na Doy. Mao na lang na nahibilin sa akong ‘major vices.’ Ang uban ako na gibyaan kay di na nako kaya Jib.”
Mituhikhik ug katawa ang buang sa akong gisulti. “Haar, haar, har! Unsay wa nay kaya ‘Kol, retired na o’ ‘as in, wa nay kaya?”

“Buang nimo. Lain na imong sabot sa wa na koy kaya no? Imo huna-huna kadtong imong kanunay nga gihimo karon kay bata pa man mong mag-asawa. Di na mao akong gikpasabot Doy. Hugaw kaayo ka ug huna-huna Jib ba.”

“Ikaw man gud ‘Kol; di ba naa ka sa media? Di ba ang role sa inyong propesyon kinahanglan klaro ang tanan nga mensahe nga buot ninyo ipadangat sa publiko? Okay, unsa man diay buot nimo ipasabot sa imong gisulti nga wa na kay kaya?”
Tubag nako, “Jib, may edad na ko…” “O, mao lagi na im,ong gipasabot….” “Hoy, ikaw buanga ka hipuson ko na imong kape karon.” Mihagikhik na pod katawa si JB dayong ingon, “Bitaw ‘Kol, padayon sa imong gisulti ganiha.”

“Mao lagi to Jib, may edad na ko hasta pod imo auntie. Retirado na mi sa trabaho. Wa na mi sweldo ginadawat kada bulan. Pensyon na lang. Gamay pa gyud kaayo.”

“Aw, hapit na man mo umentohan sa inyong pensyon ‘Kol. Di ba mao na pasalig sa Kamara nga ilang paningkamutan nga mapalusot ang resolusyon nga magmando sa pagpataas sa pensyon bali P2,000 ug nga kini himuon sa makaduha ka installment. Bali usa ka libo karon daw pagsulod sa bag-ong tuig?”

“Di kaayo nato saligan ang Kamara Jib kay bisan pa ug kalusot sa ilahang kabahin kinahanglan pod aduna kini susamang bersiyon sa Senado. Unya hapit na baya mag Christmas break ang Kongreso. Basin di na nila maakatar ang resolusyon sa umento sa pensyon.”

“Pero ngano man gyud nga ingon ka ‘Kol nga wa nay kaya. Duha man mo ni Auntie.”

“Gunggonga gyud nimo Jib uy. Alangan na man gamiton nako sa akong ‘major vices’ ang pensyon ni auntie nimo. Perting bukoha nako ana.” “Bright gyud diay ka ‘Kol. Segurista gyud ka nga di mapangka sa imong mga sekreto. Pero unsa man ang tsansa anang pension increase ‘Kol?” “Jib, hangtud mosulod sa akong account ang dugang kantidad diha pa ko motuo. Seguro pod ko nga karon nag ‘grandstanding’ man lang na mga kongresista nga nag-ingon nga molusot na ang resolusyon sa di pa matapos ang tuig, ug nga ma-release ang umento sugod sa Enero sunod tuig. Di na ko bag-o sa kinaiya sa mga kongresista; labi na karon nga dugay pa kaayo ang sunod eleksiyon.

“Basin abutan pa nga mo-retire ko ‘Kol, di pa maaprubahan ang pension increase kon sundon nato imong ideya sa kalangayan sa kongreso.”

“Ah, diha Jib mora ug moabot na gyud na increase sa pensyon. Huna-hunaa gud nga kinahanglan pa ka ug mga 29 ka tuid una makapensyon. Basin sobra pa kay bata pa man ka kaayo; mao na nga dako ka pa ug kaya.”

“Ikaw gyud ‘Kol ba, pahaging gyud na imong sulti. Mora ug ‘loaded’ ug green ba. Na, kon di ko nimo dayon patemplahan ug kape ako gyud pangutan-on si auntie kon wa na gyud mo kaya.”

“Ugok man ka Jib. Ayaw pagsulti-sulti ana kon naa si Auntie nimo. Kon imo na himuon sagulan nako vetsin imo kape.”

“Joke lang to ‘Kol uy. Mora pod sa joke sa kongreso nga ilang ipalusot ang umento sa pensyon sa di pa sila mag Christmas break.”

“Ato na hibaw-an Jib karon sunod mga adlaw kon kumedya lang to sa Kamara ilang gisulti. Sigi, tiwasa na na imo kape aron mopauli na. Basin anhi pa ka maniudto sa balay. Di ko gusto mahimo na nimo ‘major vice.’ Kinahanglan ‘minor vice’ lang nimo ang pagsulopot dinhi kausa kada semana. Diha na gyud mi klaro nga di ka ‘afford’ Jib.”

“Okay ‘Kol, noted nako imo sulti. Dali ra man ko estoryahon ‘Kol. Hangtud sunod Domingo puhon.”

“Unsa na inuon ni, may hangtud sunod Domingo ka pa?

Share this post:
error20
fb-share-icon20
Tweet 20
fb-share-icon20

Powered By ICTC/DRS
WP Twitter Auto Publish Powered By : XYZScripts.com
error

Enjoy this blog? Please spread the word :)

Facebook20
Instagram20