fbpx Press "Enter" to skip to content

Nunot | Mao ni ‘double whammy’

Kaniadtong milabay nga Huwebes, kalit nga ning-alegre ang among balay kay ang tanan nga sakop sa pamilya diha man. Ang wala lang mao ang among anak nga tu-a sa Dakbayan sa Sugbo nagpuyo. Salamat, o walay salamat sa gipatuman nga lockdown sa Davao Region.

Naa ang tanan nga mga sakop sa pamilya kay naatol usab nga sa maong adlaw “day off” sa usa namo ka anak lalake samtang ang among kamanghuran nagsugod na sab sa iyang “work-at-home” nga sistema’ng gipatuman sa iyang kompaniya, kabahin sa pagpanagana sa karon mikuyanap nga coronavirus disease 2019 kon COVID-19. Wala na sab klase ang duha ka mga apo mao nga puno ang lamesa sa among pagpamahaw sayo kaayo kay naanad na man nga mao kini ang gihimo matag adlaw kaniadto nga wala pa matugaw ang sitwasyon sa dakbayan tungod sa COVID-19.

Inay modungan sa pagtambong didto sa kan-anan akong gikuha ang akong kape ug didto na ko naghinayhinay ug higop niini atubangan sa akong computer. Niadtong tungora nagsusi ko kon duna ba ko’y nadawat nga mga e-mail gikan sa mga higala, mga paryente, ingon man sa tigbasahan sa akong inadlaw nga lindog dinhi niining mantalaan.

Ambot kon ningsimpatiya ba ang sitwasyon kay blanko pud ang akong e-mail box; walay sulod. Bisan ang akong mga pag-umangkon ningkutat pud ang ilang kakugi nga magpadala ug mensahe bisan pangumusta man lang.

Niadtong tungora mora ug nagkahurot na sab ang akong kape nga gikalingawan sa pagsuyop. Wa na nako masimhot ang alisngaw sa kape’ng barako nga gitempla sa akong Misis kay nabugnaw na sab. Mao nga ako na lang gikuha ako’ng cellphone aron susihon unsa ang gikalingawas sa paghisgot sa akong mga paryente sa kabahin sa akong pamilya didto sa Cebu ug dili lakip ang sa ako-a nga Misis. Naa man gud ning ilang gihimo nga group chat aron kuno dali lang magkahinibaw-anay ang tanan nga mga paryente sa kalihukan sa kaliwat. Wa ko mag-aktibo nga miyembro sa maong group chat kay makahurot og oras.

Motampo lang ko kon tawagon ang akong atensiyon mahitungod sa usa ka butang kalabot sa pamilya.

Ug sanglit kaniadtong Huwebes klaro man nga dako ang akong bakante nga oras, akong gipangbasa ang mga chat sa Facebook ug Messenger.

Daghan ko ug gikahimut-an sa ilang mga gihisgutan mao nga na-enganyo ko sa pagpadayon. Apan kalit lang akong nadunggan akong Misis ug among anak babaye nga nagyawyaw didto sa likod sa balay diin sila nagtabangay sa paglaba sa mga bulingon nga sinina. Diay kalit kaayo nga nawala ang tubig gikan sa tubo sa Davao City Water District.

Ning-apil na pud sa pagreklamo ang akong 13-anyos nga apo’ng babaye kinsa mao ang gisugo sa pagpanghugas sa mga plato’ng gikan-an.

Unsaon nga wa pa niya matunga sa pagpanabon ang mga plato ug baso wa nay tubig nga ning-agas sa gripo.

Ako una gihulat nga molabay ang halos 30 minuto gikan sa pagkahanaw sa tubig una ko nagtawag sa hotline sa DCWD aron unta mangutana unsa ang hinungdan sa pagkahanaw sa serbisyo ug unsa’ng oras mobalik ang tubig. Pero sama sa akong kasinati-an kaniadtong milabay nga semana ang numero 297-3293 duha lang ang dangatan. Mora og patay ang linya, ug kanunay nga busy. Gisulayan usab nako ang pipila sa mga nalista nga mobile phones pero “cannot be reached for the moment” pud ang tubag. Alanganin pud ko nga kanunay maggamit sa akong cellular, basin mahutdan na hinuon ko og load di na ko katawag kon naay mga emerhensiya ug kalabot sa akong trabaho isip journalist.

Akong gisulayan sa makadaghan ang numero 235-3293 sa Matina Main Office. Lipay akong paminaw sa dihang nag kuriring sa pikas nga tumoy sa telepono. Apan nadismaya na sab ko kay sama sa miagi nga semana recorded ang tubag nga nagtudlo sa pagpindot sa numero nga 0 (zero) kon wa ko kabalo sa local sa akong tawgan. Ug ang sunod nako nga nadunggan mao ang usa ka recording nga napasidaan nga ang tawag i-record ug ang gihisgutan didto mahimo nga gamiton sa kompaniya sa pagtumbok sa mga reklamo sa mga konsumante aron kini kahatagan sa tukma nga solusyon. Unya ningsunod ang laing pahibalo nga kuno importante sa ilaha ang akong tawag mao nga kini ipasa ngadto sa usa ka call center agent alang sa tukma nga tubag. Human ang pipila ka segundos ningbalik ang recorded nga mensahe nagpahibalo nga wala pay bakante nga call center agent aron moatiman sa ako-a ug maghulat lang una ko. Sulod sa halos 15 minutos nako nga paghulat ug sa pagpaminaw sa balikbalik nga recorded nga tubag, wa gyud intawon nahitabo.

Ningbalhin na sab ko ug tawag sa numero 221-9400 sa Bajada nga opisina pamasin nga dunay makatubag sa ako unta nga ipangutana. Pero ang akong nabati mao ang “This number is currently not in service.” Ning-undang na lang ko ug tawag sa maong buhatan ug didto na ko nanawag sa editorial office niining mantalaan. Akong gipangutana ang editorial assistant kon duna ba’y namantala nga “Advisory” ang DCWD mahitungod sa water service interruption nga nahitabo niadtong buntaga. Human ang halos 20 minutos nga paghulat gitawgan ko sa among editorial assistant ug gisultihan nga wala siya’y nakita nga advisory. Ang labing ulahi nga advisory nga namantala sa Times mao ang nahitabo nga water service interruption kanidtong Marso 16.
Human akong gitawgan ang Davao Light aron susihon kon dunay gikatakda nga power outage didto dapit sa Tugbok diin didto ang tinubdan sa tubig nga gi-apod-apod diri sa Catalunan Grande. Ang tubag sa call center sa DLPC, wala. Mao nga ako na lang giingnan ang mga sakop sa pamliya nga maghulat na lang kanus-a mobalik ang tubig. Kaluoy sa Gino-o mga ala una na sa hapon ningsugod og tulo ang tubig sa gripo.

Ang naka-apan lang kay walay nakahuna-huna sa amo-a nga magpundo og tubig seguro sa pagtu-o nga wala’y mahitabo nga laing water outage niadtong adlawa. Apan dako ang among pagmahay kay mga bandang alas 7:30 nawala na sab ang tubig sa among gripo.

Nagtawag na sab ko sa pamasin nga naa na’y makahatag og tubag ngano nga nawagtang na pud ang tubig. Pero ang nahitabo, mora lang ug “copy paste” ang akong kasinati-an sa buntag niadtong mao gihapon nga adlaw. Home confinement na tungod sa COVID-19 lockdown, nawad-an pa ug tubig kaduha sulod sa usa ka adlaw. Mao to klaro nga “double whammy.”

Sa akong hunahuna nakapangutana ko, pila lang kaha diay ka trunk lines ang call center sa DCWD ug pila ra pud ka call center agents ang anaa sa serbisyo aron manubag sa mga tawag?

Ambot kon naay ikatubag si Madam Duhaylungsod ug si Atty. Bernard Delima ani. Please…

Share this post:
error
Facebook
Facebook
Twitter
Visit Us
Instagram
RSS