fbpx Press "Enter" to skip to content

Rough Cuts | Asa kaha ta dalhon ani’ng mga imbestigasyon?

Human sa among pamahaw kaniadtong milabay nga Miyerkoles dali ‘ko nga milakaw dalikyat didto sa gamay nga uma aron tan-awon unsa na ang kahimtang sa pipila ka puno-an nga cacao nga nagbunga na. Kini tungod kay human halos mangamatay ang mao nakong mga tanum tungod sa taas nga huwaw mga tulo ka tuig ang milabay medyo naghinayhinay na kini ug lambo pagbalik.

Pero igo lang ko nakaabot sa uma tu-a miapas na ang akong usa pa ka pag-umangkon nga si JR nga manghud ni JB. Kining si JR bag-o lang ningpauli gikan sab sa Saudi nga nagtrabaho isip barista sa usa ka coffee shop didto. Sa akong huna-huna mapornada na pod ang akong Miyerkoles nga wala kaayo’y mahimo.

Ug tinuod gyud kay human sa iyang pag-abot wa na man koy nabuhat kon dili makig-estorya sa iyaha. Mao nga nangita na lang mi ug landong aron medyo hayahay ang among pagbaylo-ay ug mga ideya ug pagbalita-anay.

“ ‘Kol, unsa na man ni ang nahitabo sa atong nasud nga nagkaguliyang na man ang mga opisyales sa ehekutibo ug sa Kongreso. Unya ang duha ka dagkong hinungdan sa maong kasamok mao ang mahitungod sa gitawag nga raket sa panguwarta sa Bureau of Immigration nga ilang gitawag ug ‘Pastilyas’, ug ang karon nabuking nga pagpalusot ug milyon-milyon nga dolyares cash agi sa Bureau of Customs ug sa Imigrasyon gihapon. Mora ug magsigi na lang seguro ug imbestigar ang Senado ani. Unya mora sab wa kaayo’y klaro unsa ang gihimo sa naa sa Malacanang ‘Kol Vic agi ug reaksiyon sa maong mga balita gawas lang sa pasalig ni Presidente Digong nga walay ‘brod brod sa fraternity, walay amigo-amigo’ kon siya moaksiyon na sa maong problema.

Tubag nako, “Lagi Ji, nagkaguliyang na hinuon sila. Ang Senado padayon sa ilang hearing mahitungod sa ‘pastilyas’ diin ang mga mosulod nga mga langyaw kadaghanan kanila mga Intsik kon Tsino, ubanan pa ug escort nga taga Imigrasyon kay diay naay tag P10 mil nga bayad matag usa nga palutson. Unya JR nilibo baya ang mga Tsino nga nia diri sa Pinas karon nga nagtrabaho sa mga POGO kon Philippine Overseas Gaming Organizations.

Subay sa nautingkay sa imbestigasyon sa Senado ‘VISA upon arrival’ pa gyud ang gihatag sa mga Intsik. Mas dako seguro ang makurakot sa taga BI sa maong sistema Ji. Unya ang nagbutyag sa maong pangurakot kawani sa BI nga nag-ingon nga di na niya maagwanta ang kalihukan sa iyang mga kaubanan mao nga iya kining gisikreto ug kuha’g mga video aron ilig-on sa iyang gipagawas nga pasangil.”

“Unya ‘Kol, tinuod kaha to ang giyagyag ni Senator Gordon nga halos walay gihimo ang administrasyon aron masanta o maimbestigahan man lang ang pagpalusot ug milyon-milyon nga dolyares cash dinhi sa nasud? Kumpleto pud si Gordon ‘Kol ug mga video footages sa mga malita sa kwarta nga nakuha sa iyang mga tinubdan. Gani iya pa nga gibutyag nga kuno ang taga Customs nagpahibalo ngadto sa Central Bank mahitungod sa maong palusot sa duha ka grupo sa mga Intsik usab ug sa usa ka pundok mga Pinoy nga mao ang tigpasulod sa salaping dolyar nga cash dinhi. Ang tubag kuno sa CB ‘Noted’ lang.

“Bug-at na sab kaayo paminawon to’ng giingon sa senador nga taga Zambales nga nagsobra na ang kalu-ag sa administrasyong Duterte sa pagtratar ani sa gobiyerno sa China hinungdan nga gi-abuso na ta sa mga Tsino. Ang mga sindikatong gipadagan sa mga Tsino labi na sa sugal ug prostiotusyon nia na gipahiluna sa Pilipinas. Sa ilang gidadhanon dinhi ug sa kadaghan sa ilang kwarta halos ang mga Tsino nga nagtrabaho sa mga POGO ug nagpadagan sa mga prostitusyon ug ubang mga raket apil na ang gibutyag nga paluisot sa mga dolyares nga cash mao na ang nanimuyo sa dagkong mga condominium ug halos nag-arkila sa mga eksklusibo nga mga subdivisions sa Metro Manila.

“Unya ‘Kol, akong namatikdan nga mora ug limitado pa kaayo ang mga reaksiyon sa Presidente sa maong pasangil gawas sa pag-ingon nga pa-imbestigahan pa sa Malacanang ug diha pa ang aksiyon himuon.”

Sumpay nako, “Ay JR, mora na pud ka sa imong maguwang nga si JB; nag-anam ka hingkod ang panghunahuna. Dili na inom ang kanunay nga sulod sa ulo sama kaniadto. Karon naghunahuna na mo sa mga nanghitabo sa atong nasud. Salamat sa Ginoo JR. Pero kon ako imo pangutan-on, manghinaot ko nga positibo nga dawaton sa Presidente ang maong pasangil sa mga nanghitabo sa pipila ka mga buhatan sa gobiyerno ubos sa iyang administrasyon. Malipay ko kon dili siya mamersonal kang Gordon ug ni Senadora Hontiveros. Kaniadto man gud dihay gisulti si Gordon nga wa magustohi sa Presidente ug gang iyang tubag sobra ka personal nga gilakip ang pagtumbok sa tiyan sa senador inay ilimiti lang ang iyang reaksiyon didto sa isyu nga gituki sa magbabalaod. Sa ako man gud nga panglantaw JR kon mogawas ang reaksyon sa usa ka opisyal ngadto na sa personal posibli nga sabton kini nga paglikay sa kamatuoran. Pero Ji, ato na lang hulaton asa mosangpot kining mga bag-ong isyu mahtuinguod sa kuno pagpasagad sa pipila ka mga opisyales sa gobiyerno ug sa kakulang sa aksiyon sa Presidente sa maong mga kwestiyonabli’ng mga katikaran.”

“Na hala,mangape ta sa balay. Basin naa pa’y init nga tubig didto. Kon nakaluto na sa paniudto imo auntie mangaon na lang ta.”

“Okay kaayo ko ana ‘Kol,” nagngisi nga misumpay si JR.

Share this post:
error
Facebook
Facebook
Twitter
Visit Us
Instagram
RSS