fbpx Press "Enter" to skip to content

Nunot | Human SEA Games laing ‘torneyo’ na sab

Kagahapon sayo sa buntag nakahigayon ko pagpangabli sa akong e-mail una ko ninglakaw ngadto sa akong umahan sa bukid.

Usa ka mensahe akong nakita nga naggikan sa akong pag-umangkon nga si JB ang misulod dili pa lang gyud dugay subay sa oras nga iyang gihisgutan didto sa iyang pagpadala sa maong e-mail.

Si JB tu-a nagtrabaho sa Jeddah, Saudi Arabia, nag-antus sa kalayo ug kamingaw sa iyang pamilya aron lang kahatagan sila ug maayong kinabuhi.
Mao ni iyahang mensahe:

“Maadyong adlaw nimo diha sa Dabaw ‘Kol Vic! ‘Naot naa ka sa maayong panglawas kanunay ug wa moy problema sa pamilya ni Auntie karon nga nagka edad na mo.

“Kol, grabe pud kahinam namo diri mga Pinoy sa akong gitrabaho-an ug ingon man sa mga silingan namo nga mga establisemento samtang magpaabot mi sa mga balita diha sa ato-a may kalabutan sa bag-o pa lang natapos nga 30th South East Asian Games. Kada human sa among ‘shift’ sa restaurant modiretso mi sa among giabutan nga balay ug didto maghulat sa balita sa telebisyon o dili ba magsusi sa internet posting kon unsa na ang labing ulahi nga talaan sa mga medalya. Ako ug ang akong mga kaubanan ug kahigalaan nga mga Pinoy nag-atang pila na ka mga bag-ong bulawan, pilak ug bronse nga medalya ang nadungag sa koleksiyon sa ato mga atleta sa matag adlaw nga nagpadayon ang torneyo.

“Wa mi mga kauban diri nga mga taga nasud sa ASEAN pero pipila kanila naggikan sa mga nasud nga mga Muslim. Mao nga sa among paminaw duna sila’y pagpabor sa mga atleta nga gikan sa mga nasyon nga Muslim usab ang kadaghanan sa katawhan. Sama na lang sa dako nila nga pagpaluyo sa mga atleta gikan sa Indonesia, Malaysia, Brunei ug Singapore nga sa kanunay ilang gisunod ang mga dula. Sa dihang gipildi sa Indonesia ang ‘women’s team’ sa Pinas sa volleyball grabe ang ilang kantiyaw sa amo-a nga mga Pinoy. Maayo na lang ‘Kol Vic nga di-a mi diri sa Saudi nga Muslim usab ang relihiyon sa halos tanang tawo. Kay kon diha pa to sa Pilipinas ug ubang nasud nga dili Muslim, segurado gyud ‘Kol nga nagsinumbagay na mi sa among mga kaubanan nga mga Muslim.

“Karon ‘Kol Vic wa na gyud sila mangantiyaw sa amo nga mga Pinoy diri kay unsaon nga amo man dayon sila pakitaon sa resulta sa mga dula ug sa gidaghanon sa mga medalya nga nahakot sa atong mga atleta. Hilum na lang sila. Unya ‘Kol wa pud namo nalikayan nga madala sa kalipay sa mga Pinoy gumikan sa pagkadeklara sa Pinas nga opisyal nga kampeon sa maong torneyo. Nag celebrate pud mi uy. Ningbangka usa namo ka kauban.

“Unya ‘Kol Vic, human sa malampuson nga pagdula sa mga atleta’ng mga Pinoy, naa sab diay misunod nga bag-ong torneyo. Pero di na nalambigit ang mga magdudula nga mga Pilipino kon dili ang mga opisyales sa mga hugpong nga nagpadagan sa maong 30th SEAGames ug ang mga imbestigador sa Senado ug Kongreso, lakip na usab ang Omudsman sa Pilipinas. Unya ‘Kol ang venue sa torneyo mao na ang mga conference rooms sa duha ka mga balay balauranan, ug posible ang korte sa Sandigang Bayan.

“Ug subay sa naandan ang mga politico ug ang media mao na ang mga bida. Pero mahimo pud nga sila ang mas kontra bida. Sa kabahin sa mga imbestigahan sama nila organizing committee chair Speaker Alan Peter Cayetano ang ilang papel mag-agad sa ilang ikapakita nga katakos sa maong torneyo. Kon sila nakaseguro nga walay hocus pocus ang ilang mga proyekto sa pagpasiugda sa 30th SEA Games natural lang nga sila mogawas nga mananaog sa mata sa katawhan ug mismo sa mga kunohay referee sa ‘torneyo’ nga ilang ginasalmotan. Pero ‘Kol, seguro kon naa gyud usa sa ilaha o sila ba hinuon nga tanan nga nagpadagan sa kada duha ka tuig nga dula nga, sa lingwahe sa kapulisan ‘sila’y may paglalagyan’
Unsa man imong panglantaw ani nga katikaran ‘Kol Vic, duna kaha ni kapaingnan nga ‘torneyo’?”

Sa akong pagbasa sa maong e-mail ni JB akong namatikdan nga siya wa lang basta nagbasa, iya pud gi-analisar ang mga nahitabo dinhi sa Pinas subay sa balita nga nidangat didto sa iyang gitrabaho-an sa Jeddah. Mao nga naka-ingon ko sa akong kaugaligon nga ang pagkalayo sa tawo gikan sa iyang kaugalingon nga nasud makatabang pud sa pag-lig-on sa iyang kaugalingon nga baruganan ug makapalantip sa iyang kahibalo. Mao nga ako gibalusan si JB sa usa ka mubo apan direkta nga mensahe.

“Dong JB, mora ug wa na ko’y ikadugang pa sa imong mga mensahe. Imo na man giladlad ang tanan nga angay mahibaw-an sa katawhan. Ang tanan nimo gisulti sa imong e-mail mao gyud ang nanghitabo diri atol sa SEA Games, ug karoin usab nga natapos na ang mga dula. Mao nga ang akong tambag: Hulata na lang pud ang mga balita sa gipahiluna nga imbestigasyon mahitungod sa kuno mga anomaliya sa paggamit sa pundo sa pag ‘host’ sa SEA Games. Unya i-email na lang pud sa ako-a ang imong panahom mahitungod sa mga katikaran sa imbestigasyon. Tukma man gud tanan imong gipanulti Doy, mao nga nagtu-o ko nga mas nakahibawo ka sa mga nahitabo sa Pinas kay sa ako-a. SEND

Share this post:
error
Facebook
Facebook
Twitter
Visit Us
Instagram
RSS