fbpx Press "Enter" to skip to content

Nunot | Na-a na ta ‘bragging rights’

Kaniadtong Huwebes sa hapon hangtud na lamang nagabi-I mora ko ug gilansang sa akong gilingkuran sa balay samtang nagtan-aw sa mga dula sa langoy nga gipahiluna didto sa Aquatics Center sa New Clark City agi ug kabahin sa ika 30 nga South East Asian Games. Ang mga nagkadaiyang “events” sa langoy “live” nga gi “cover” sa telebisyon.

Didto akong nakita nga luyo sa paningkamot sa mga manlalangoy sa Pilipinas wa gyud silay nahimo batok sa mga delegado gikan sa Singapore ug Vietnam. Klaro nga maaninaw ang kakulangan sa hustong pasilidad sa ensayo sa mgha Pilipino. Seguro kon sayo nga gimugna ang mga karon pasilidad nga gigamit sa nagpadayon nga SEA Games, basin mas moasenso pa unta ang ilang katakos sa dula nga langoy.

Human sa mga events nga medyo naghatag sa ako-a ug kadismaya niadto na lang ko sa akong computer aron magsulat sa akong lindog alang niining mantalaan. Pero una ko nagsugod sa pagsulat ako una gitan-aw ang akong e-mail box aron basahon ang mga naa didto.

Dunay tulo ka mga mensahe nga misulod ug usa na niadto ang gikan sa akong pag-umangkon nga si JB. Mao ni iyang e-mail:

“Kumusta man ‘Kol Vic? Okay lang ka? Wa na mobalik ang sakit sa imong tuhod nga gi-operahan kaniadtong Oktobre 2014? Ngutana ko ‘Kol kay mora ug naa pud ko gibati nga panagsang pagsakit sa akong tuhod. Hinuon, ako lang lingawon akong kaugalingon nga kini dunay kalabutan sa akong trabaho diri sa Saudi. Kaniadto man gud nga nagwaiter pa ko sa usa ka restaurant diri halos sulod sa walo ka oras nga kanunay magbarog. Unya sa dihang nabalhin ko sa kusina aron magtabang sa pagpangluto sa pagkaon, magbarog lang gihapon. Mao lang ni akong gihuna-huna ‘Kol Vic kay bata pa man ko; layo pa man ko moabot ug 40 anyos.

“Bitaw ‘Kol ang kanunay gibantayan namo nga mga Pinoy nga mga empleyado diri mao ang nagpadayon nga dula sa SEA Games diha sa Pilipinas. Amo gisunod ang resulta pinaagi sa internet. Lipay kaayo mi diri nga sa matag adlaw nga gipahiluna ang mga dula nagpadayon sa pagkamada ug mga medalya ang Pilipinas labi na sa mga medalya nga bulawan. Mao nga bisan ug kita ang nag-una sa medal tally ug dako ang kahigayonan nga mahimong overall champion sa pagsira sa torneyo wa pud namo nalikayi ang pagkadismaya nga naghuna-huna sa gidangatan sa atong mga manlalangoy kaniadtong Huwebes. Wa gyud tawon silay nahimo batok sa mga taga Singapore, Vietnam, Indonesia, Thailand ug Malaysia. Nadugangan pa gyud amo kaguol dihang go-estretan sa Thailand ang Pilipinas sa dulang volleyball sa mga babaye. Maayo na lang nga sa ika tulo nga set, nagpakita ug talagsaon nga katakos ang mga Pinay nga halos ila na nga mapildi ang Thailand sa maong set sulod sa halos upat ka higayon. Pero pildi gihapon. Nakadismaya lang ‘Kol Vic kay kon kanus-a pa ikatulo nga set diha pa hinuon sila nagpakita sa kalagsik ug abilidad aron matumbasan ang katakos sa taga Thailand. Pero okay na sa amo-a diri kay ang Pinas man gihapon ang nag-una sa medal tally. Maayo unta kon di na maapsan pa.

“Unya ‘Kol Vic, namingaw lagi kaayo ang mga kritiko sa administrasyon nga sa dayong sugod sa torneyo halos ila na nga gibubo ang tanan nga ilang makita nga makadaot sa nasud atubangan sa mga internasyonal nga komunidad. Una gibandilyo sa Ilonggo nga senador nga si Franklin Drilon ang kuno sobra ka mahal ug magarbo nga sug-anan samtang magpadayon pa ang mga dula sa SEA Games didto sa New Clark City. Matud pa sa senador nga sobra kini ka mahal ug unta ang 50 milyones nga gigasto sa paghimo sa iyang giingon nga ‘kaldero’ pwede na kuno nga itukod ug 50 ka mga classrooms. Di ba ‘Kol Vic iyang gisaway ang administrasyon ug ang Philippine SEA Games Organizing Committee nga wala maghatag sa tukma nga prioridad sa paggasto sa kwarta sa katawhan? Unya si kanhi Presidente PNoy di ba nagpatawag pa ug ‘press conference’ aron usab sawayon ang kuno maluho kaayo nga pag ‘host’ sa Pinas sa maong torneyo sa mga dula sa kanasuran nga sakop sa ASEAN? Sa akong paminaw ‘Kol, sa gipakita nga katakos sa mga atleta nga mga Pinoy ug sa ilang paghakot ug medalya, mora ug nanga-amang ang mga kritiko. Seguro di lang sila makapagawas sa ilang kalipay ug pagdayeg sa mga Pinoy kay maolaw. Unya ‘Kol ang mga parehas nimo nga mga sakop sa medya sa Pinas nga grabe ang pagdaot sa kuno mga palpak nga preparasyon hilum sab sila. Ila na lang seguro nga gitabunan ang ilang kaulaw pinaagi sa pagreport sa mga estorya sa pagdaog sa mga atleta’ng Pinoy. Di ba ‘Kol Vic?”

Wow! Mura ug halos susama ang gibati sa mga Pinoy bisan asa sila nga dapit sa kalibutan labot sa karon gipakita nga katakos sa mga atleta nato atol sa nagpadayon nga SEA Games. Bisan ang akong pag-umangkon nga si JB nga sabong ang paborito nga kalingawan dinhi sa Pinas, nakat-on sab sa pagsunod sa mga nanghitabo sa mga dula sa 30th SEA Games. Nagpakita na sab siya ug garbo sa mga magdudula nga Pinoy sa ilang nahimo nga kalampusan sa torneyo. Mao nga kini na lang ang akong natubag sa iyang e-mail:

“Dong JB, mura man ug nagtukma ra gyud sa kadugayan ang atong mga huna-huna mahitungod sa usa ka isyu. Mao usab kana ang akong nahimo nga obserbasyon diri sa Pilipinas. Nanga-amang na ang mga kritiko sa administrasyon labi na sa kuno mga kakulangan ug magasto nga ‘hosting’ sa SEA Games. Sa binukid pa nga sinultihan ‘hilum pa sila sa Tirana.’

“Husto pud ka Doy sa imong panahom nga posibli nga dili sila plastada nga makapagawas sa ilang pagdayeg sa mga katikaran karon sa torneyo kay nag-una na man sila ug saway ug nga daw ila na man gihusgahan ang kapasidad sa nasud nga mag ‘host’ sa maong mga dula. Ug tungod sa mga nahimo sa atong mga atleta JB pwede na ka makabaton sa gitawag sa Iningles nga ‘bragging rights.’ Kay kinsa man ang dili maengganyo pagpanghambog kon ang imong kaparehas nga mga Pinoy mao ang nag-una sa paghakot ug mga medalya sa napulo ug usa ka adlaw nga South East Asian Games, abir?”

Share this post:
error
Facebook
Facebook
Twitter
Visit Us
Instagram
RSS