fbpx Press "Enter" to skip to content

Nunot | Posible’ng kasinahan sa ubang mga dapit

Kagahapon sayo sa buntag nag-abli ko sa akong computer aron magsulat niining akong lindog. Pero una ko nagsugod sa pagsulat ako una gi-ablihan ang akong e-mail aron susihon kon naa ko mga nadawat nga e-mail.

Naa gyud ug kini gikan sa akong pag-umangkon nga si Nelson Anasco nga tu-a nagtrabaho sa Port Moresby, Papua New Guinea. Kini si Nelson mao ang akong giingon sa mga naha-una nakong gisulat dinhi nga mapagarbuhon nga nag-ingon nga mora lang gihapon siya ug ni-a sa Dabaw kay kanunay niyang gisunod sa pagbasa ang Mindanao Times nga makita usab sa Facebook. Mao nga kon unsa ang katikaran dinhi sa Dabaw iya kining mahibaw-an matag adlaw. Gani kini usab ang kanunay nga gihimo nga kalingawan sa pagbasa sa iyang mga kauban nga mga Pinoy didto.

Mao ni iyang e-mail:

“Maayong adlaw nimo diha ‘Kol Vic. Kumusta man ka ug sila Auntie Nene ug ako mga cousins nga sila Shari ug Achill? Kami ni Sacha kanunay nag chat ug ako nahibaw-an nga ang ilang barko paingon diay karon sa Karachi, Pakistan.
“Moabot ko diha sa ato ‘Kol karong ika 13 sa Agosto kay mao man ang akong tinuig nga bakasyon karong bulana. Atol pud ni sa kasal sa akong manghud nga si Archie. Husto gyud nga higayon kay makatambong pud ko. Siya ra ba among kamanghuran ug nakatabang pud siya sa ako-a samtang nangandam ko sa pagbiyahe sa Papua New Guinea.

“Unsa man ni among nabasa sa inyong mantalaan ‘Kol Vic nga ang konseho sa Dakbayan sa Dabaw nagpasa ug resolusyon nga naghangyo ni Presidente Rodrigo Duterte nga tangtangon na ang Martial Law diha sa ato-a. Tinuod na ‘Kol? Unsa man ang posible nga implikasyon ana kon hatagan ug pabor sa Presidente labi na nga siya taga Dabaw ug kanhi mayor pa gyud sa dakbayan? Di ba lain paminawon ‘Kol? Di ba mora ug naghatag ug dako nga pabor si Presidente ngadto sa iyang dakbayan ug gihikawan ang uban nga mga dapit sa Mindanao kansang mga molupyo nagtu-o nga ang kahimtang sa kahusay ug kalinaw sa ilaha susama o dili layo sa sitwasyon sa Dabaw?

“Pananglitan ‘Kol Vic, ang dakbayan sa Butuan, General Santos ug Surigao, bisan gani ang Cagayan de Oro makita man sa talaan sa mga krimen nga nahitabo didto nga mga normal lamang nga panghitabo sa usa ka malambo-on nga katilingban. Mao nga sa akong panahom, kon ang Dabaw tangtangon sa mga nasakop sa mga dapit nga gipahiluna ang martial law, dako ang kahigayonan nga mosunod sab sila pagpasa ug resolusyon nga di na sab sila ilakip sa martial law. Sa maong sitwasyon lisud nga ipasabot sa Presidente ngano nga dili niya tugotan ang ilang hangyo ug ngano nga tugotan ang Dabaw.

“Gawas pa ‘Kol sa akong personal nga pagsabot mahimo nga mogamit ang mga opisyal sa mga nahisgutan nga mga dapit sa talaan sa mga krimen nga nahitabo ug susihon kon pila ka porsento niini ang posible nga may kalabutan sa kalihukan nga terorismo. Ug sanglit sa mga dakbayan nga posibleng mosunod sa lakang sa Dabaw mora ug wala bisan usa nga krimen ang matudlo nga kabahin sa terorismo normal lang nga matingala ang mga opisyal kon dili dawaton sa Presidente ang ilang hangyo, di ba ‘Kol Vic? Unsa man imong huna-huna sa maong kahigayon ‘Kol, di ba mahimo nga matandog pud ang garbo sa mga residente sa maong mga dapit?”

Medyo nakurat ko sa argumento sa akong pag-umangkon nga si Nelson. Pero seguro di na ko angayan nga mahibulong kay matag adlaw iyaha man nasunod ang mga panghitabo sa atong Mindanao pinaagi niining mantalaan.
Mao nga ako siyang gitubag niining mosunod:

“Balo ka Nel nagtukma gyud ang ako ug imoha nga panglantaw sa maong isyu. Subay sa ako na nga natuki sa mga unang lindog nako dinhi, akong gituho-an nga segurado gyud nga masina pud ang uban nga mga dakbayan ug lalawigan kon ang hangyo sa Dakbayan sa Dabaw nga sila tangtangon sa ‘coverage’ sa martial law tugotan sa Presidente. Ako nagtu-o Nel nga ang mga dapit nga ako’ng nahisgutan sa unahan dinhi mo-insister nga sila pud dapat ipagawas sa martial law ‘coverage.’
Posible nga sila maka-ingon nga sila pud nanginahanglan sa mga ‘investors’ nga karon dako ang pagduha-duha nga mosulod samtang naa pa ang martial law. Mao nga Nel, sa akong pagtu-o magduda gyud ang ubang mga dapit nga ipadayon pa gihapon ang martial law nga usa ka dili makatarunganon nga pagpabor sa Dakbayan sa Dabaw kon kini lang ang tangtangon gikan sa paglangkob sa balaod militar. Seguro kini angayan nga huna-hunaon pag-ayo sa mga taga Dabaw ug sa mga tigtambag sa Presidente.”

Share this post:
error
Facebook
Facebook
Twitter
Visit Us
Instagram
RSS