Press "Enter" to skip to content

Nunot: Mingaw nga eleksiyon ‘di ka kompyansaan

Mga duha na ka semana nga wa ko kadawat ug e-mail gikan sa akong pag-umangkon nga si JB kon John Briann nga tu-a sa Jeddah, Saudi Arabia.Pero kaniadtong Huwebes sa akong pagsusi sa akong e-mail box adunay mensahe nga gipadala si JB mao nga ako kining gi-ablihan. Pero una nako kini gibasa nagtermpla una ko ug kape. Kay nagdali man ko nagkuntento na lang ko sa “instant coffee”. Sa akong huna-huna dili layo ang lami sa “instant” ikompara sa akong naandan nga “brewed native” nga kape nga regalo sa ako-a sa akong mga higala ug sa akong anak nga nagtrabaho sa Hedcor kansang mga nanag-unang planta tu-a sa Benguet.

Tuod man wa ko masayop kay ang alisngaw sa “instant coffee” di layo sa brewed. Nanuhot-suhot pud ni sa akong ilong nga nagwagtang sa katulogon nga naghinay-hinay na sa pagsira sa mga tabon-tabon sa akong mata.

Mao ni ang mensahe sa akong pag-umangkon nga si JB:

“Maayong ‘Good Morning’ diha ‘Kol Vic. Musta man ka diha, sila Auntie Nene ug ako mga cousins nga imong mga anak, okay ba mo diha? Musta man ang lokal nga eleksiyon sa Davao ‘Kol Vic? Seguro mingaw kaayo kay wa man mga kaatbang ang mayor, bise mayor ug ang mga kongresista. Mao nga “boring” ang kampanya. Unya ang mga kandidato pagka konsehal sa dakbayan pulos pud nagpaila nga kaanib sila sa administrasyon. Tanan gusto nga maisa ilang kamot sa mayor o di ba sa mga kapitan sa barangay nga klarong sakop sa duha ka mga partido’ng ‘Hugpong.”

“Subay sa akong nabasa sa inyong Mindanao Times nga adlaw-adlaw gi ‘post’ sa Facebook bisan ang unang adlaw sa kampanya sa mga kandidato alang sa lokal nga mga posisyon, mora ug kulang sa kamaya. Ang nahimo nga mga nag-unang balita mao ang pag-ilugay sa mga tigkampanya sa mga kandidato pagka konsehal sa tulo ka mga distrito sa Dakbayan sa mas prominente nga lugar nga kabutangan sa ilang mga ‘campaign posters.’  Gani ‘Kol, subay sa mga balita nga namantala sa Mindanao Times, sa mga barangay nga layo sa sentro sa dakbayan lakip na ang tu-a sa kabukiran, bisan mga poste ug mga puno-an sa kahoy wa na maka-ikyas sa mga pangkampanyang mga posters ug gagmay nga mga billboards. Naa pud ko nakita nga mga hulagway nga namantala sa Mindanao Times mga covered courts diin nagbitay ang mga tarpaulin posters sa mga kandidato pagkakonsehal nga sobra sa kadako-on nga gitugot sa COMELEC. Di kaha ni mosangpot sa kakulang sa kaikag sa mga botante nga mosalmot sa piniliay diha mismo sa atu-ang dakbayan ‘Kol Vic.”

Medyo mubo lang ang e-mail sa akong pag-umangkon nga si JB. Pero lawom ug mahinungdanon pud ang isyo nga iyang buot mahisgutan sa ako’ng tubag sa iyaha.

Busa mao ni akong gitubag sa iyang e-mail:

“Husto gyud kaayo ang imong punto Jibby subay sa imong interpretasyon sa dagan sa lokal nga politika diri sa Dakbayan sa Dabaw karon. Mingaw ug kulang sa kaikag ang pagpahiluna sa kampanya sa politika karong umaabot nga pinili-ay diri sa atong dakbayan. Kanunay lang nga wala si Mayor Inday Sara diri kay di na man siya manginahanglan nga mangampanya kay wa ma’y kaatbang. Wala pud hasul ang kandidato pagka bise mayor kay wa pud gihuna-huna nga kontra. Unya unsa pa’y ipangampanya sa mga kadidtato pagka Kongresista nga wala pud huna-hunaon nga kaatbang kay wa ma’y nangahas nga mokandidato batok sa ilaha. Maayo gyud pagkapakling sa makinarya sa kampanya kay human na man ang eleksiyon alang sa lokal nga kagamhanan. Sa panultihon sa Iningles JB, Ang pinili-ay karon diri sa Dabaw sa mga nanag-unang pwesto sa dakbayan, kini usa ka “Walk in the park” nga sitwasyon. Mora ba Jibby ug ‘confirmatory’ na lang ang pag-adto sa presenkto aron mobuto. Hinuon Jib, sa mga ningdagan pagka konsehal posibli pa sila ang magdautay sa matag usa bisan nga sila nagdala sa mao lang gihapon nga bandera sa administrasyon. Natural lang na Dong Jibby kay sa kadaghan sa buot masulod sa ‘Magic 8’ gikinahanglan na nga magminatrido ang uban aron dunay igo nga rason nga sila dunggon sa ilang hangyo nga butohan sa pinili-ay karong Mayo 13, adlaw nga Lunes. Dili layo ang kahigayonan nga samtang dagko ang ilang katawa sa ilang pagkuyog-kuyog pangampanya luyo sa maong katawa ug pahiyom ang grabe nga intrigahay sa usa’g usa. Diha unya sa ilang pagdina-utay Dodong Jibby mahimugso ang desisyon sa katawhan kinsa ilang pili-on sa nagsinobra nga gidaghanon sa mga nagpa-pili. Naa pa pud Jib hulga sa kalinaw ug seguridad sa atong dakbayan, labi na karon nga panahon sa eleksiyon, ang mga rebelding ‘New People’s Army kon NPA. Kining ulahi nga hulga Dong Jibby mas bug-at kay tu-a man ni sila maghari-hari sa kabukiran ug pinangga ‘kuno’ sa katawhan. Unya gikinahanglan pa gyud nga moadto didto ang mga kandidato sa pagka konsehal aron pagseguro nga sila dili mabinatahaan sa bisan hain nila nga kauban nga nanagan. ‘Naot lang ta Dong Jibby nga mahatagan pud ni nga isyu sa tukma nga pagtuki aron di mahimo nga hinungdan sa bisan unsang dili maayong sangputanan sa piniliay karong May 13 diri sa atu-a.”  – SEND

-30-

Share this post:
Facebook
Facebook
Twitter
Visit Us
Instagram
RSS