fbpx Press "Enter" to skip to content

Nunot sa alisngaw sa kape | Padayon nga kauswagan

Human sa among pagsimba ni Misis kaniadtong Domingo midalikyat mi sa palengke aron mamalit sa mga kinahanglanon sa balay sulod sa usa ka semana.

Pag-abot sa balay si Misis na ang naglimpiyo sa among gipamalengke ug naghipus niini. Ako nag-andam sa akong kaugalingon aron motan-aw sa telebisyon sa away nila Manny Pacquiao ug Keith Thurman.

Pero taudtaud lang dunay mihunong nga motor. Wa magdugay nagdanga-danga na ang akong pag-umangkon nga si JB. Misulod sa gate sa balay ug walay panuko nga milipot paingon sa sala diin didto ko nagpahiluna.

Dako kaayo ug ngisi sa karaho dayon tunol sa usa ka bareta nga sabon pangkaligo. Matud sa gwatsinanggong si JB, “Kol Vic, mao ra gyud ni akong sinugatan sa imoha. Unsaon, gamay lang ako natigom samtang didto ko sa Saudi. Pero maayo na lang na nga sinugatan ‘Kol kay kada ligo nimo imo dayon ko mahinumdoman, labi na gyud kon hapit na mahurot.”

“Kumusta man ka Dong Jibby? Sori wa tika maestorya kaayo kaniadtoing imong pag-abot kay unsaon naa man gud ko lakaw ato. Gawas pa kabalo pud ko nagdali ka nga makapauli sa inyoha aron makita ang imong anak. Siyempre, apil pud ang Nanay, di ba?”
Sa akong gisulti ningisi lang ang tonto nakong pag-umangkon. Wa ko kaayo kasabot ngano mao to iya reaksiyon. Unya miadto si JB sa akong Misis ug duna pud gihatag. Pero diay, nangutana kon nagkape na ko. Ang tubag ni Misis, “Nag-init pa ko ug tubig Jib. Maayo kay ning-abot ka ug dunay kauban imo uncle nga motan-aw sa away nila Pacquiao.”

Taudtaud mibalik si JB didto sa akong nahimutangan ug miingon:

“Sama sa kanhi ako gihimo ‘Kol Vic, magsamoksamok na sab ko sa imoha atol sa oras sa tingkape. Maayo dinhi sa inyong balay sa bukid kay kabalo ko libre gyud ang kape. Duna pay pakapin nga pares. Seguro mao to akong nakita nga gi-andam ni Auntie Nene. Asa man mo ato ‘Kol nga bibingka ug suman nga dagko ug likit?”

“Dala to sa bana ni Shari Jib gikan sa Nabunturan. Didto man gud siya sa ilang ‘mining area’ ug pag-uli niya gabi-i nagdala na siya ana nga mga matang sa kalan-on. Seguro karon pa ka katilaw ana.”

Pipila ka minuto pa gihatud na ni Misis ang duha ka tasa nga kape nga nangalisngaw pa sa kainit. Ang kahumot mikulikot sa akong ilong ug si JB mismo akong namatikdan nga nagsinghot-singhot samtang iyang gipahiluna ang iyang tasa.

“Karon Jib, unsa man imong gusto nga estoryahan? Gusto lang ka sa boksing, taud-taud pa man seguro kay mao pa pagsugod sa ‘supporting bout’ una ang kang Pacquiao ug Thurman. Seguro politika na sab imong gusto nga hisgutan, di ba?”

Wa una motubag ang akong pag-umangkon kay nagsunod-sunod kini ug higop sa iyang kape. Unya…

“Di sa ko mangutana sa imo ‘Kol parte sa politika kay mora ug makasuka na man ko sa kaguliyang sa maong punto. Pero gusto nako ipasibaw ang akong pagdayeg sa mga nahimo sa gobiyerno sa daghan kaayong mga dalan nga sa akong paggikan duha ka tuig na ang milabay lubak-lubak pa ug kon dili putol-putol ang pagsemento. Gani sa ato-a nga barangay ‘Kol semento na gyud tanan ug lapad pa gyud. Di na pud lisod mosakay kon gusto nato moadto sa siyudad agi sa Calinan. Daghan na bag-ong mga pedicab, gawas pa sa habal-habal. Balita nako ‘Kol Vic bisan unsa nga oras makapauli ta gikan sa siyudad kay naay magbuntag ug biyahe nga mga tricycle. Balita pud nako kamo daw ni Auntie Nene kon moadto mo sa inyong balay sa siyudad naa lang sa 20 minutos biyahe-on gikan dinhi sa bukid?”
“Tinuod na Jibby, dali na lang kaayo kon diri moagi sa Matina Biao kay sementado na pud ang dalan. Karon lang di kaayo ko ganahan moadi sa maong rota kay giguba na sab ang dalan sa Tacunan kay gipalapdan ang semento ani. Taud-taud na mi wa moagi didto kay magkalapok ang sakyanan. Pero kon mahuman na ang maong proyekto lahos-lahos na lang ang mga sakyanan agi sa balay ni Kongresista Pulong.”

“Unsa pud ni ako nabalitaan ‘Kol Vic nga ang shortcut gikan sa Tacunan paingon sa Ula ngadto sa Biao Guianga palapdan na sab. Naa na man gud kuno mga ‘subdivisions’ nga ipahiluna didto. Dako pa gyud kaayo.”

“Tinuod na imo napanid-an Jib. Ang yuta kanhi nga kalubihan karon gipayhag na ug giandam na sa pagtikad sa usa ka subdivision. Mora ug kini mosangpot gyud sa pagpalapad sa dalan kay daghan na man ang mogamit ani nga mga molupyo didto. Mora pud ni maayo nga timailhan sa kusog nga pag-uswag sa atong dakbayan. Mao nga sa akong panglantaw, di na sab magdugay moabot na dinhi sa atong barangay ang mga dagkong proyektong pangbalay. Di na lang ta mahibulong Doy kon pipila ka adlaw magkadaiya na ang mga nawong nga atong makita sa kasilinganan.”

Naputol kalit ang among estorya ni JB sa dihang gikanta na ang Philippine National Anthem agi ug timaan sa pagsugod sa away ni Pacquiao ug Thurman. Putol ang estorya ug nagdungan na lang mi ug higop ni JB sa among kape. Taudtaud nagbirigay na ang duha ka mga boksingero alang sa unang round.
-30-

Share this post:
error
Facebook
Facebook
Twitter
Visit Us
Instagram
RSS